जिल्हा रुग्णालयातून आरोपी पसार

नगर : विनापरवाना गांजाची वाहतूक करताना कोतवाली पोलिसांनी पकडलेल्या आरोपीने सोमवारी (ता.13) सकाळी जिल्हा रुग्णालयातून पोलिसांना चकवा देत पलायन केले. सागर रामचंद्र धनापुरे (रा. तपोवन रोड, सावेडी) असे पलायन केलेल्या आरोपीचे नाव आहे. सकाळीच झालेल्या या घटनेमुळे जिल्हा रुग्णालयात एकच गोंधळ उडाला.

हेही वाचा- राज्यात ब्रह्मा-विष्णू-महेशाचे सरकार : नाना पटोले

कोतवाली पोलिसांनी तीन दिवसांपूर्वी नगर-पुणे महामार्गावर केडगाव बाह्यवळण मार्गावर गांजाची वाहतूक करताना दोघांना अटक केली होती. त्यांच्याकडून 75 हजार रुपये किंमतीचा गांजाही पोलिसांनी हस्तगत केला होता. या गुन्ह्यात पोलिसांनी आरोपी सागर धनापुरे यास अटक केली होती. 

पाठलाग करण्याचा प्रयत्न व्यर्थ

मागील दोन दिवसांपासून पोटात दुखत असल्याचे सागर सांगत होता. त्यामुळे कोतवाली पोलिसांनी त्यास रविवारी (ता.12) रात्री जिल्हा रुग्णालयात दाखल केले. दरम्यान, सोमवारी सकाळी एक पोलिस कर्मचारी त्याला जिल्हा रुग्णालयात प्रांत:विधिसाठी घेऊन जात होता. त्यावेळी त्याने पोलिस कर्मचाऱ्याच्या हाताला झटका देत जिल्हा रुग्णालयातून धूम ठोकली. कर्मचाऱ्याने त्याचा पाठलाग करीत पकडण्याचा प्रयत्न केला; परंतु तोपर्यंत आरोपी सागर धनापुरे पसार झाला. या घटनेची माहिती मिळताच कोतवाली पोलिस ठाण्याचे निरीक्षक विकास वाघ यांनी आरोपीच्या शोधासाठी पथके रवाना केली. 

अधिक माहितीसाठी- अजित पवारांच्या आदेशाला संग्राम जगतापांकडून हरताळ

जिल्हा रुग्णालयात होतात असे प्रकार 
दरम्यान, नगरमधील पोलिसांना चकवा देत गुन्हेगार पसार होण्याची ही काही पहिलीच वेळ नाही. यापूर्वीही अशा प्रकारे अनेक वेळा गुन्हेगार पोलिसांच्या ताब्यातून पसार झाले आहेत. त्यात जिल्हा रुग्णालयातून अथवा वाहनातून उडी मारून पळून जाण्याच्या घटनांच अधिक आहेत.