देशमुख-महाडिक, नाईक-नाईक एकत्र येणार | Sakal
sakal

बोलून बातमी शोधा

sangli political News

देशमुख-महाडिक, नाईक-नाईक एकत्र येणार

शिराळा : राज्यात सत्तांतराने शिराळा विधानसभा मतदारसंघातील भाजपच्या सत्यजित देशमुख व सम्राट महाडिक या युवा नेत्यांना अस्तित्व सिद्ध करण्यासाठी व आमदार मानसिंगराव नाईक, माजी आमदार शिवाजीराव नाईक यांना अस्तित्व अबाधित राखण्यासाठी एकमेकांच्या हातात हात घालून जोमाने काम करावे लागणार आहे. नाईक-देशमुख यांच्या पक्षप्रवेशामुळे शिराळ्याचे राजकारण ढवळून निघाले असले तरी बदलत्या व प्राप्त परिस्थितीनुसार त्यांनी घेतलेल्या निर्णयावर ठाम राहून त्यांना अस्तित्व टिकवण्यासाठी प्रयत्नांची पराकाष्ठा करावी लागणार आहे.

राजकारणात कोण कोणाचा कायमचा शत्रू वा मित्र नसतो, हे शिराळ्यात अनेक वेळा सिद्ध झाले आहे. शिराळ्याचे राजकारण हे पक्षापेक्षा गटावर जास्त चालते. शिराळा विधानसभा मतदारसंघात सध्या सत्यजित देशमुख, सम्राट महाडिक, शिवाजीराव नाईक, मानसिंगराव नाईक हे चार गट कार्यरत आहेत. या चार गटातील प्रत्येकी दोन गट एकत्र येऊन भाजप व राष्ट्रवादी अशी पक्षबांधणी झाली आहे. या चारी गटाने विधानसभा निवडणूक लढवली असल्याने प्रत्येकाला पक्षापेक्षा आपल्या गटाचे अस्तित्व भक्कम करावे लागणार आहे. तालुक्यात सध्या नाईक विरुद्ध महाडिक-देशमुख असेच चित्र पाहावयास मिळणार आहे.

आगामी जिल्हा परिषद, पंचायत समिती, नगरपंचायत, बाजार समिती या निवडणुकांच्या माध्यमातून सत्यजित देशमुख व सम्राट महाडिक यांना एकत्र येऊन एकदिलाने काम करावे लागणार आहे. राष्ट्रवादीच्या माध्यमातून शिवाजीराव नाईक व मानसिंगराव नाईक हे दोन एकत्र असल्याने त्यांना भाजपला आहे त्या स्थितीत थोपवून ठेवावे लागणार आहे.

नगरपंचायतीत चांगली संधी...

नगरपंचायतीवर राष्ट्रवादीची सत्ता कायम ठेवण्याचा निर्धार आमदार मानसिंगराव नाईक व माजी आमदार शिवाजीराव नाईक यांनी केला आहे. सत्ताबदल झाल्याने शिराळा नगरपंचायतीवर भाजपची मोहोर उमटवण्यासाठी सत्यजित देशमुख व सम्राट महाडिक यांनी आत्तापासून राजकीय व्यूहरचना करण्यास सुरवात केली आहे. सत्ताबदलाचा परिणाम नगरपंचायतीवर दाखवण्याची संधी महाडिक-देशमुख यांना चालून आली आहे.

Web Title: Deshmukh Mahadik Naik Naik Come Together

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top