कोयनेतून 50 हजार विसर्ग सुरु! सांगलीत आयर्विनला 18 फुटापर्यंत पाणी

सांगली: कोयना धरण पाणलोट क्षेत्रात सुरु असलेल्या संततधार पावसामुळे कोयना धरणातून आज दुसऱ्या दिवशी 50 हजार क्युसेस विसर्ग सुरु आहे. वारणा धरणातून 8 हजार क्युसेक्सने विसर्ग सुरु आहे. रात्री दहा पर्यंत 28 फुटावर पाणी जाण्याची शक्यता असून नदीकाठावरील गावातील नागरिकांनी सतर्क रहावे, असे आवाहन जिल्हा प्रशासनाने केले आहे.

अलमट्टी धरणातून 57 हजार क्युसेसने विसर्ग सुरु आहे. जिल्ह्यात किरकोळ रिमझिम पाऊस सुरु आहे. कोयना पाणलोट क्षेत्रामधील पर्जन्यमानामुळे धरणामध्ये मोठ्या प्रमाणात पाण्याची आवक होत असल्याने धरणाची पाणी पातळी नियंत्रित करण्यासाठी सोमवारी सायंकाळी 7 वाजता धरणाची वक्रद्वारे 5 फुट 3 इंच उचलून सांडवा व पायथा विद्युत गृहाद्वारे एकूण 50 हजार क्युसेक्स विसर्ग नदीपात्रात सोडणेत येणार आहे. धरणामधील आवक वाढल्यास सदर विसर्गामध्ये वाढ होण्याची शक्यता असल्याने कोयना नदीपात्रा जवळील गावांना सतर्कतेचा इशारा देण्यात येत आहे.