संकेश्वर प्रभाग 13 साठी पोटनिवडणूक

संकेश्वर: येथील प्रभाग 13 चे नगरसेवक संजय नष्टी यांचे अल्पशा आजाराने निधन झाले होते. त्या जागेसाठी निवडणूक आयोगाने निवडणूक जाहीर केली आहे. राज्यभरात 11 ठिकाणी पोटनिवडणूक होत आहे. सोमवार (ता. 2) पासून निवडणूक आचारसंहिता लागू केली आहे. सोमवारी (ता. 2) ते सोमवार (ता. 9) मे अर्ज दाखल करणे, 10 मे रोजी अर्जाची छाननी, 11 मे रोजी अर्ज माघार, 20 मे रोजी मतदान व 22 मे रोजी निकाल असे निवडणूक वेळापत्रक आहे.

नगरसेवक संजय नष्टी यांच्या निधनाला महिना उलटण्याच्या आत निवडणूक जाहीर झाली आहे. धडाडीचे नगरसेवक म्हणून शहरात त्यांची ख्याती होती. आता त्यांचा वारसदार कोण, हा प्रश्न निर्माण झाला असून सध्या भाजप व काँग्रेसमध्ये या जागेसाठी चुरस आहे. संजय नष्टी हे काँग्रेसमधून निवडून आले होते. त्यामुळे या जागेवर काँग्रेसचा हक्क आहे. याकरिता संकेश्वर घटक काँग्रेसचे अध्यक्ष संतोष मुडसी, कुणाल पोतदार, सनी पचंडी तर भाजपमधून बसवराज बागलकोटी, अॅड. संतोष नेसरी, शिवानंद उर्फ नंदु मुडसी यांची नावे चर्चेत आहेत. भाजप विरुद्ध काँग्रेस लढत निच्छित असून दोन्ही पक्षाच्या वरिष्ठांकडून कोणता उमेदवार निच्छीत केला जातो, याकडे सर्वांचे लक्ष लागून राहिले आहे. यामध्ये नष्टी परिवाराच्या सहानभुतीचाही विचार होऊ शकतो. मंत्री उमेश कत्ती, रमेश कत्ती व काँग्रेसचे नेते ए. बी. पाटील यांची प्रतिष्ठा पुन्हा एकदा या निवडणुकीत पणाला लागणार आहे.