बेळगावात शिक्षक संघटनेच्या निवडणुकीत मोठी चुरस ; उद्या होणार मतदान

बेळगाव : सर्व शिक्षकांचे लक्ष लागुन राहिलेल्या प्राथमिक शिक्षक संघटनेची निवडणुक मंगळवार (15) रोजी होणार आहे. सकाळी 7.30 ते दुपारी 4 या वेळेत मतदान होणार असुन बेळगाव तालुक्‍यातील शिक्षक सरकारी मराठी शाळा क्रमांक 5 येथे तर शहरातील शिक्षक सरकारी कन्नड शाळा क्रमांक 26 विश्वेश्‍वरय्यानगर येथे मतदानाचा हक्‍क बजावणार आहेत. कोरोनाचे सर्व नियम पाळुन मतदान प्रक्रिया पार पडणार आहे. 

नोव्हेंबर 2019 मध्ये मुदत संपलेल्या प्राथमिक शिक्षक संघटनेची निवडणुक काही दिवसांपुर्वी जाहीर करण्यात आली होती. त्यानुसार 6 डिसेंबर निवडणुक होणार होती. मात्र बंगळुर येथे समस्या निर्माण झाल्याने अर्ज भरण्याच्या शेवटच्या दिवशी निवडणुक पुढे ढकलण्यात आली होती. त्यामुळे शिक्षकांमधुन आश्‍चर्य व्यक्‍त करण्यात येत होते. तसेच निवडणुका पुढे ढकलण्यात आल्याने न्यायालयात धाव घेण्यात आली होती. यावेळी निकाल देताना नवे वेळापत्रक जाहीर करुन निवडणुक घेण्याचा आदेश बजावण्यात आला होता. 

हेही वाचा - एकसंब्याने दिला पहिला हिंदकेसरी! -

वेळापत्रक जाहीर झाल्यापासुनच शिक्षकांनी मोठ्‌या प्रमाणात प्रचारावर भर दिला होता. शहर आणि तालुक्‍यात गुरुस्पंदन व परीवर्तन पॅनेलमध्ये मोठ्‌या प्रमाणात चुरस असुन निवडणुक जाहीर झाल्यापासुनच दोन्ही पॅनेलतर्फे जोरदार प्रचार करण्यात आला आहे. तसेच शिक्षकांच्या समस्या सोडविण्याचे दोन्ही पॅनेलकडुन आश्‍वासन देण्यात आले आहे. सकाळी 7. 30 वाजल्यापासुन मतदानाला सुरुवात होणार आहे. तर मतदानानंतर सांयकाळी 5 वाजता मत मोजणीला सुरुवात होणार असुन रात्री 8 वाजेपर्यंत निकाल हाती येणार आहेत. 

शहरात 700 शिक्षक मतदार आहेत तर तालुक्‍यात 1493 शिक्षक मतदार असुन यापैकी सर्रास मतदारांपर्यंत पोहचण्याचा प्रयत्न दोन्ही पॅनेलतर्फ करण्यात आला आहे. निवडणुक जाहीर करण्यात आल्यापासुन बैठका, मेळावे आणि, सभांसह भोजनावळीवर भर देण्यात आला होता. त्यामुळे शिक्षक संघटनेची निवडणुक चुरशीची होण्याची शक्‍यता आहे.

हेही वाचा -  निवडणूक उमेदवारांनी पक्षाचे चिन्ह वापरल्यास होणार आता गुन्हा दाखल -

संपादन - स्नेहल कदम