अबकारी खाते शेर आणि उमेदवार मात्र सव्वाशेर

बेळगाव : एका व्यक्‍तीला एकावेळी दहापेक्षा जास्त दारूच्या बॉटल्स विक्री करण्यावर अबकारी खात्याने निर्बंध घातले आहेत. त्यामुळे ग्रामपंचायत निवडणुकीतील उमेदवारांची चांगलीच गोची झाली आहे. कोणत्याही परिस्थितीत दहापेक्षा जास्त बॉटल्स दारु विक्री करण्यात येऊ नये, अन्यथा संबंधित दुकानावर कारवाई करण्याचा इशारा देण्यात आला आहे.

दरम्यान, दारु मिळविण्यासाठी उमेदवारांनीही शक्‍कल लढविली असून आपल्या समर्थकांना विविध मद्य दुकानांना पाठवून दारुसाठा केला जात आहे. ग्रामपंचायत निवडणुकीच्या पार्श्‍वभूमीवर आचारसंहिता जारी झाल्याने याची जिल्ह्यात काटेकोरपणे अंमलबजावणी केली जात आहे. मतदारांना आमिष दाखविण्यासाठी दारु पुरविली जाण्याची शक्‍यता व्यक्‍त करत अबकारीने मद्यविक्री दुकानांवर कडक निर्बंध लादले आहेत.

हेही वाचा -  जीवनसाथीच झाला वैरी ; पतीनेच केला पत्नीचा घात -

जिल्ह्यातील मद्यविक्री दुकानदारांना एका व्यक्‍तीला एकावेळी दहापेक्षा जास्त दारुची बॉटल्सची विक्री न करण्याची सूचना केली आहे. या निर्बंधामुळे उमेदवारांकडून गोवा बनावटीच्या दारुची तस्करी होण्याचा शक्‍यता आहे. याला आळा घालण्यासाठी कणकुंबी तपास नाक्‍यावरही वाहन तपासणी कडक करण्यात आली आहे.

गोव्याहून बेळगावकडे येणाऱ्या सर्व प्रकारच्या वाहनांची कसून तपासणी करण्यात येत आहे. गेल्या आठ दिवसात कणकुंबी तपासणी नाक्‍यावर मोठ्या प्रमाणात दारुसाठा जप्त करण्यात आला आहे. अबकारी खात्याने मद्यविक्री दुकानांवरही निर्बंध लादले असले तरी अनेकठिकाणी बेकायदा मद्यविक्री सुरुच आहे. त्यावर कधी अंकुश येणार, असा सवाल उपस्थित केला जात आहे. उमेदवारांनीही चांगली शक्‍कल लढविली असून दारुसाठा करण्यासाठी समर्थकांना विविध ठिकाणच्या दारु दुकानांना पाठविण्यात येत आहे. तर काहींनी निवडणूक जाहीर होताच दारुसाठा केल्याची चर्चा आहे.

हेही वाचा - उमेदवारीच्या आमिषाने घातला १० कोटीचा गंडा ; भाजपच्या स्थानिक नेत्यांमध्ये रंगली चर्चा
 

"निवडणुकीच्या पार्श्‍वभूमीवर आचारसंहितेचे सर्वांनी काटेकोरणे पालन करावे. विशेषकरून जिल्ह्यातील मद्यविक्री दुकानदारांनी कायद्याच्या चौकटीत दारूची विक्री करावी. एका व्यक्‍तीला केवळ दहाच बॉटल्स दारूची विक्री करण्याचे बंधन आहे."

- सी. एस. पाटील, अबकारी उपअधीक्षक

संपादन - स्नेहल कदम