कोगनोळी : बंगळूर येथे छत्रपती शिवाजी महाराजांच्या (Chhatrapati Shivaji Maharaj)पुतळ्याची विटंबना झाली. त्याचे पडसाद बेळगाव व कोल्हापूर (Belgaum and Kolhapur)जिल्ह्यात मोठ्या प्रमाणात उमटले. बेळगाव जिल्ह्यात अनेक गावात निषेध मोर्चे व बंद पाळण्यात आले. त्याचप्रमाणे सीमेलगत असणाऱ्या कोल्हापूर जिल्ह्यातही बंद पाळून निषेध व्यक्त करण्यात आला. या पार्श्वभूमीवर कर्नाटक सीमा तपासणी नाक्यावर बंदोबस्त कडक करण्यात आला आहे. महाराष्ट्रातून कर्नाटकात जाणाऱ्या वाहनांवर अद्याप कडक नजर ठेवण्यात आली आहे.बेळगावमध्ये निघालेल्या निषेध मोर्चा व बंदला पाठिंबा देण्यासाठी महाराष्ट्रातील नेते जातील, या उद्देशाने सीमा तपासणी नाक्यावर नेत्यांना कर्नाटक प्रवेशबंदी करण्यात आली आहे. या आधी महाराष्ट्रातील नेतेमंडळी कर्नाटकात असणाऱ्या कोगनोळी टोल नाक्यावर येऊन कर्नाटक सरकारचा निषेध करत. तसे आता न होण्यासाठी या ठिकाणी बंदोबस्त वाढविण्यात आला आहे.
महाराष्ट्रातून कर्नाटकात जाणाऱ्या चारचाकी वाहनांची कसून चौकशी करण्यात येत आहे. या वाहनांमधून मोर्चासाठी जाणाऱ्या नेतेमंडळींना परत महाराष्ट्रात पाठविण्यात येत आहे. कोणताही अनुचित प्रकार घडू नये, म्हणून बंदोबस्त कडक करण्यात आला असल्याचे सांगण्यात आले.
कोगनोळी सीमा तपासणी नाक्यावर निपाणीचे मंडल पोलिस निरीक्षक संगमेश शिवयोगी, निपाणी ग्रामीण पोलिस ठाण्याचे उपनिरीक्षक अनिल कुंभार, कोगनोळी पोलिस उपठाण्याचे एएसआय एस. ए. टोलगी, एएसआय एस. आय. कंबार, पोलिस राजू गोरखनावर यांच्यासह पोलिसांनी बंदोबस्त ठेवला आहे.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.