छानच की...अपघातविरहीत सेवेसाठी लालपरीची चतु:सुत्री 

सोलापूर : राष्ट्रीय सुरक्षा परिषदेच्या निर्देशानुसार 11 जानेवारी ते 25 जानेवारी दरम्यान राज्य परिवहन महामंडळातर्फे सुरक्षितता मोहीम राबवली जाणार आहे. अपघातविरहीत सेवेसाठी लालपरीने आता चालकांना "प्रवाशांच्या सुरक्षेची जबाबदारी, वाहतुकीचे नियमांचे पालन, उत्तम शरीर प्रकृती आणि मन:स्वास्थ्य" या चतु:सुत्रीचे पालन करण्याचे आवाहन एसटी महामंडळाचे उपाध्यक्ष तथा व्यवस्थापकीय संचालक रणजीतसिंह देओल यांनी केले आहे. 

हेही आवश्‍य वाचा : खरंच अवघड आहे...मुलांच्या कर्जाची पालकांकडून वसुली 

रस्ता सुरक्षा मोहिमेत चालकांचे प्रबोधन, प्रशिक्षण, आरोग्य तपासणी, वाहन परवाना तपासणी, गाड्यांची तांत्रिक तंदुरुस्ती अशा अनेक बाबींवर भर दिला जाणार आहे. 
दररोज सुमारे 65 लाख प्रवाशांना दळणवळणाची सुरक्षित सेवा देणारी एसटी महाराष्ट्राची लोकवाहिनी बनली आहे. गेल्या 71 वर्षात अविरत आणि सुरक्षित सेवेतून प्रवाशांच्या मनात एसटीबद्दल विश्‍वासार्हततेची भावना लालपरीने निर्माण केली आहे. या विश्‍वासाला बळकटी देण्याच्या उद्देशाने एसटी महामंडळामध्ये ही सुरक्षितता मोहीम राबविण्याचा निर्णय घेतला. सध्या महाराष्ट्रात एसटीमध्ये सुमारे 34 हजार चालक कार्यरत आहेत. अपघाताची कारणे शोधून त्यावर उपाययोजना करण्याच्या दृष्टीने एसटीने चालकांसाठी वेळोवेळी प्रशिक्षण शिबिराचे आयोजन केले जात आहे. अपघात विरहित सेवा बजावणाऱ्या चालकांना रोख बक्षिसे देऊन राष्ट्रीय सणाच्या दिवशी गौरवण्याचाही उपक्रम राज्य परिवहन महामंडळाने सुरु केला आहे. चालकांना सुरक्षित प्रवासाचे महत्व पटवून देण्याबरोबरच त्यांचे मानसिक संतुलन सुदृढ करण्याच्या दृष्टीने आगार पातळीवर समुपदेशनही करण्यात येत आहे. 

हेही आवश्‍य वाचा : सोलापुरात देशव्यापी संपाला संमिश्र प्रतिसाद 

ठळक बाबी... 

• 71 वर्षांची लालपरी दररोज 65 लाख प्रवाशांची करते वाहतूक 
• राज्य परिवहन महामंडळाच्या 34 हजार चालकांचे आगारांमध्ये होणार समुपदेशन 
• प्रबोधन, प्रशिक्षण, आरोग्य तपासणी, वाहन परवाना तपासणी, गाड्यांची तांत्रिक तंदुरुस्तीवर भर 
• गेल्या काही वर्षात इतर प्रवासी वाहनांच्या तुलनेत एसटीच्या अपघातात घट