जागेचा ताबा मिळवण्यासाठी महिलेचा विनयभंग, सामानाची मोडतोड दहा जणांवर गुन्हा

बार्शी - घराच्या जागेचा ताबा मिळविण्यासाठी जागा मालकाने घरात शिरून साहित्यांची तोडफोड करत गर्भवती महिलेस मारहाण करून तिचा विनयभंग केल्या प्रकरणी बार्शी शहर पोलिसात दहा जणांवर गुन्हा दाखल करण्यात आला आहे. 

या बाबत अधिक माहिती अशी की येथील तानाजी चौक येथे संभाजी माने यांच्या कुटुंबियांच्या मालकीची जागा आहे. या जागेत पीडित महिला व तिचे परिवार मागील तीन पिढ्यानपासून राहत आहे. या बाबत दोन्ही कुटुंबात एकमेका बाबत तक्रारी आहेत. सोमवारी (ता १) दुपारी पीडित महिला व तिची ननंद घरी असताना दहा ते पंधराजण अचानक घरात शिरून शिवीगाळ करून घरातील संसारउपयोगी साहित्याची तोडफोड केली. तसेच घरातील समान बाहेत टाकून दिले व मारहाण केली. याचवेळी पीडित महिलेने मी गर्भवती आहे असे सांगितले असता माने याने तुझे खाली होऊ दे, मी तुला गर्भवती करतो असे लज्जा वाटेल असे वर्तन केले. दरम्यान पीडितेचा पती मध्ये आला असता त्याच्या डोक्यात वीट मारून त्यास जखमी केले. तसेच सोन्याची चेन, मंगळसूत्र, अंगठी, मोबाईल असे सुमारे एक लाख २४ हजार रुपयांचा ऐवज असलेली बॅग घेऊन गेले असल्याची फिर्याद बार्शी शहर पोलिसात दाखल झाली आहे. या प्रकरणी अनिल माने, बाळासाहेब माने, आकाश माने व इतर असे दहा जणांवर विनयभंग, मारहाण, घरात घुसून साहित्याचे नुकसान, ऐवज घेऊन जाणे प्रकरणी गुन्ह दाखल करण्यात आला आहे.