विखे गटाच्या मदतीने भाजपला धोबीपछाड

श्रीगोंदे : पंचायत समितीच्या सभापतिपदी गीतांजली पाडळे व उपसभापतिपदी रजनी देशमुख यांची आज निवड झाली. दोघीही राष्ट्रवादी कॉंग्रेसच्या सदस्य आहेत. बहुमत असतानाही एक सदस्य अपात्र झाला आणि दुसरा फुटल्याने भाजपला पंचायत समितीची सत्ता आज गमवावी लागली. माजी आमदार राहुल जगताप यांची जादू चालली. त्यांनी विखे पाटील गटाच्या सदस्यांना सोबत घेत भाजपच्या हातून सत्ता हिसकावली. 

जाणून घ्या -  नगरमधून कचराकुंड्या हद्दपार 

श्रीगोंदे पंचायत समितीत भाजपचे सात, तर दोन्ही कॉंग्रेसचे पाच सदस्य होते. तथापि, सभापती- उपसभापती निवडणुकीपूर्वी भाजपचे काष्टी गणातील सदस्य अमोल पवार यांना जातपडताळणी प्रमाणपत्र वेळेत सादर न केल्याप्रकरणी अपात्र ठरविण्यात आले. काष्टी येथील कार्यकर्ते विक्रम पाचपुते यांनी त्यांची केलेली तक्रार आज विरोधकांच्या पथ्यावर पडली. भाजपच्या भानगाव गणातील सदस्य आशा गोरे काही दिवसांपूर्वीच "राष्ट्रवादी'च्या गोटात गेल्याने भाजपला धक्का बसला. गोरे यांचे पती सुरेश गोरे बाबासाहेब भोस यांना मानतात. 

पाचपुते यांच्या विरोधात एकी कायम

माजी आमदार जगताप यांनी नियोजनबद्ध खेळी करीत आज भाजपच्या हातातील सत्ता हिसकावली. सभापती व उपसभापती निवडीत "राष्ट्रवादी'च्या बाजूने सहा आणि विरोधी भाजपला पाच मते मिळाली. जगताप यांना विखे गटाची मोठी मदत झाली. रजनी देशमुख यांचे पती सिद्धेश्वर देशमुख विखे पाटील यांचे कट्टर समर्थक आहेत. विखे गटाचेच सदस्य अण्णा शेलार यांनी जगताप यांच्या मदतीने भाजपकडून सत्ता काढून घेताना, एक प्रकारे विखे गटाचीच मदत घेतल्याने, श्रीगोंद्यात भविष्यात आमदार बबनराव पाचपुते यांच्या विरोधात ही एकी कायम राहील असे संकेत मिळाले. 

हेही वाचा- पंचायत समितीच्या कारभाऱ्यांची निवड 

निवडीनंतर नवनिर्वाचित सदस्यांचा सत्कार झाला. जगताप यांच्यासह घनश्‍याम शेलार, अण्णा शेलार, बाबासाहेब भोस, शिवसेनेचे तालुकाप्रमुख भाऊसाहेब गोरे, केशव मगर, दीपक भोसले, हरिदास शिर्के, सुरेश लोखंडे उपस्थित होते. 

"व्हीप'चा गोंधळ 
निवडणूक निर्णय अधिकारी म्हणून पहिलीच वेळ असलेल्या प्रांताधिकारी रोहिणी नऱ्हे यांनी अतिशय शांतपणे निवडप्रक्रिया हाताळली. भाजपचा गटनेता अपात्र ठरल्याने शहाजी हिरवे यांची नवा गटनेता म्हणून निवड झाली असून, मतदानाबाबतचा "व्हीप' सदस्य गोरे यांना तेथेच बजावण्याचा प्रयत्न झाला. मात्र गोरे यांनी तो नाकारला. त्यानंतर नऱ्हे यांनी ही प्रक्रिया पार पाडली.