होळी केली कोरोना राक्षसाची 

सांगली : सांगली-मिरजेसह परिसरातील उपनगरात आणि ग्रामीण भागात पारंपारिक पद्धतीने होळी साजरी करण्यात आली. सांगलीतील खणभाग पोलिस चौकीजवळील मित्र मंडळाने यंदा होळीत "कोरोना व्हायरस' च्या प्रतिकृतीचे दहन करून भारत कोरोना विषाणूविरोधात लढण्यासाठी सज्ज असल्याचा संदेश दिला. 
 

हे वाचा - या जिल्ह्यात उडणार पुन्हा एकदा निवडणुकीचा धुरळा

विशेषत: उत्तर भारतात उत्साहाने होणारा सण म्हणून होळीला ओळखले जाते. होळी, दुसऱ्या दिवशी धुळवडला रंगोत्सव केला जातो. महाराष्ट्रात होळीनंतर पाचव्या दिवशी रंगपंचमी खेळली जाते. महाराष्ट्रात कित्येक वर्षे पारंपारिक पद्धतीने होळी साजरी केली जाते. शहरी भागासह ग्रामीण भागात अनेक ठिकाणी शेळी, लाकडे गोळा करून होळी पेटवली जाते. यंदाही मंडळांच्या होळीबरोबर अनेकांनी वैयक्तिक घरासमोर शेणी विकत आणून होळी पेटवल्याचे चित्र दिसले. होळीत नारळ, पुरणपोळीचा नैवेद्य दाखवण्यात आला. 

हे वाचा-या तालुक्याची द्राक्षे चाखतोय संपूर्ण देश 

सोमवारी सायंकाळनंतर शहरातील अनेक चौकात होळी पेटवल्याचे चित्र दिसले. होळीसमोर फेर धरून चिमुकल्यांनी बोंब मारली. सायंकाळीनंतर टिमक्‍याचा आवाज सर्वत्र घुमला. होळीत टाकलेले नारळ आणि पुरणाची पोळी हात घालून बाहेर काढणारे तरूणही दिसले. होळीनिमित्ताने अनेक मंडळांनी परिसर स्वच्छ करून तेथील कचरा जाळून स्वच्छतेचा संदेश दिला. 
होळीनिमित्त खणभाग पोलिस चौकीजवळील मंडळाने होळीत "कोरोना राक्षस' अशी प्रतिकृती बनवून त्याचे दहन केले. कोरोना व्हायरसला घाबरून न जाता त्याचा दक्षतेने सामना करून तो नष्ट करा, असा संदेश होळीच्या माध्यमातून दिला.