Sangli : गृहिणींचे कोलमडले आर्थिक बजेट

बिळाशी : सध्या सातत्याने वाढत जाणाऱ्या महागाईने शहरी भागात राहणाऱ्यांसह विशेषतः ग्रामीण भागात राहणाऱ्या सर्वसामान्यांचे आर्थिक बजेट कोलमडल्याने त्यांचे जगणेच अवघड झाले आहे. खाद्यतेल, भाजीपाला, डाळी,पेट्रोल-डिझेल बरोबरच घरगुती गॅसही खूप महागला असल्याने सर्वसामान्यांनी जगायचे कसे? असा प्रश्न सामान्यांना पडला आहे.

गेल्या वर्षापासून अनेक नागरिक कोरोनाच्या विळख्यात सापडले आहेत. कोरोना कार्यकाळात अनेकांना आपल्या नोकऱ्या गमवाव्या लागल्या आहेत. व्यवसायावरही मोठ्या प्रमाणावर परिणाम झाले आहेत, काहींचे व्यवसायही बंद पडले आहेत. त्यातच सातत्याने वाढती महागाई आहे, त्यामुळे सर्वसामान्य नागरिकांना जीवनाशी खऱ्या अर्थाने संघर्ष करावा लागत आहे. सरकार सर्वसामान्यांना दिलासा देण्याऐवजी महागाईच्या खाईतच लोटत आहे. घरगुती गॅस जवळपास हजारांच्या घरात पोहोचला आहे.

त्यातच गॅस एजन्सी धारकांनी नेमलेले वितरक गॅस घरपोच सेवेच्या नावाखाली गॅस रकमेपेक्षा आगाऊ रक्कमही ग्राहकांकडून घेत आहेत. महागाईने महिला वर्गातून विशेषतः तीव्र नाराजी व्यक्त होऊ लागली आहे. कडाडलेले भाजी-पाल्यांचे दर सर्व सामानान्यांना न परवडणारे असल्याने सामान्य विशेषतः आहारात डाळींचा वापर करत असतात. परंतु गरिबांच्या ताटातील डाळही १०० ते १२० रुपयांपर्यंत महागल्याने त्यांचे जगणेच मुश्कील झाले आहे. त्यात कोरोनाने अनेक कुटुंबीयांची उत्पादनाची साधनेच बंद पडल्याने सामान्यांची हाल अपेष्टा होत असल्याने गृहिणींचे आर्थिक बजेट कोलमडले आहे.