गाववाल्यांना टेन्शन.. प्रशासनाच्या नजरा चुकवून येणाऱ्यांचे, २०० किमीसाठी मोजतात चार हजार

नगर ः नोकरीनिमित्त जिल्ह्याबाहेर गेलेले अनेक जण कोरोनाच्या भीतीने गावांमध्ये दाखल झाले असले, तरी अजूनही काही जण शहरांमध्ये अडकलेले आहेत. ही मंडळी प्रशासनाच्या नजरा चुकवत गावांकडे काही जण येत आहेत, ही बाब चिंतेची असतानाही त्याचे गांभीर्य कोणीच मनावर घेत नाही, हे विशेष.

वॉर्डबॉय आला केईएममधून पळून

मुंबईतील एका रूग्णालयातील डॉक्टर, नर्सला कोरोनाची लागण झाली आहे. त्या रूग्णालयातच अकोला तालुक्यातील एक वॉर्डबॉय काम करीत होता. परंतु आपले वरिष्ठ कोरोनाची लागण झाल्याने उपचार घेत आहेत. कदाचित आपल्यालाही कोरोना होईल या भितीने त्याने घर गाठलं. यायला काहीच साधन नव्हतं म्हणून तो पायी चालत आला. अकोले आणि मुंबईच्या मध्ये डोंगर आहे. त्या डोंगराच्या कडेकडेने तो चालत गावी आला. कोरोना बाधितांच्या संपर्कात आल्याने त्याला जिल्हा प्रशसानाने गावातून उपचारासाठी ताब्यात घेतले  आहे.

हेही वाचा - भाजीपाला उत्पादकांसाठी झाला हिरवा निर्णय

जिल्ह्यातील ग्रामीण भागातील अनेक जण नोकरीनिमित्त मुंबई, पुणे, नाशिक, ठाणे, कल्याण आदी ठिकाणी गेलेले आहेत. मात्र, कोरोनाचा प्रादुर्भाव झाल्याने लॉकडाउन करण्यात आले आहे. यामुळे सर्वच उद्योग- व्यवसाय बंद पडलेले असल्यामुळे आता शहरात राहून करायचे काय, असा विचार करून अनेकांनी गावचा रस्ता धरत गाव गाठले आहे. मात्र, ही स्थिती लवकर सुरळीत होईल, अशी आशा बाळगणाऱ्यांची निराशा झाल्याने, त्यांनीही आता गावचा रस्ता धरला आहे.

चोरटी प्रवासी वाहतूक

यातील काहींनी पायी मजल- दरमजल करीत गावाकडे येत आहेत. अशा व्यक्ती दिवसा प्रशासनाच्या नजरेत आल्यानंतर त्यांना अटकाव केला जात आहे. मात्र, काही जण रात्रीचा प्रवास करून आडवाटेने गावांमध्ये दाखल होत आहेत. मुंबई, ठाणे, कल्याण आदी भागांतून काहींना नगर जिल्ह्यातील संगमनेर, अकोले या भागात आणून सोडण्यासाठी चारचाकी वाहनधारक प्रतिव्यक्ती तीन ते चार हजार रुपये आकारत आहेत. या बाहेरून येणाऱ्यांमुळेच आता नागरिकांमध्ये भीती निर्माण झाली आहे.