कृष्णेच्या पाणी पातळीत वाढ... का...?

सांगली : चार दिवसांपूर्वी कृष्णा नदीची आयर्विन पुलानजीक पाणीपातळी खालावत सहा फुटांवर गेली होती. त्यामुळे गढूळ पाणी पुरवठा होऊ लागला होता. पण आता कोयना धरणातून पाणी सोडण्यात येत असल्यामुळे शुक्रवारपासून पाणी पातळीत वाढ झाली असून शनिवारी दुपारी दहा फुटांवर पाणी पातळी झाली आहे.

चार दिवसांपासून आयर्विन पुलाजवळ कृष्णेची पातळी किमान साडेचार फुटांवर होती. चार महिन्यांपूर्वी म्हणजे आठ व नऊ ऑगस्टरोजी कृष्णेच्या महापुराने आयर्विनच्या पूरमापक पट्टी ओलांडून महापुराचा नवा विक्रम केला होता. पाटबंधारे आणि जिल्हा प्रशासन यांच्यातील नियोजना अभावी महापुराने जे थैमान घातले त्याने नागरिकांचे आतोनात नुकसान झाले होते. मात्र तेव्हा 56 फुटांच्यावर गेलेली पातळी जानेवारी महिन्यात सहा फुटांवर आली आहे. सध्या हिवाळा सुरू असताना एवढ्यात ही पातळी खाली गेल्याने पाण्याच्या नियोजनांबद्दल संतप्त प्रतिक्रिया नागरिकांतून उमटू लागल्या होत्या. त्यामुळे पाणीपुरवठ्याचे जॅकवेल उघडे पडले होते. त्यातच महापालिकेचे पाणी पिण्यास अयोग्य असल्याचा अहवाल आल्याने खळबळ उडाली होती. 

दरम्यान शुक्रवारी कोयनेतून पाणी सोडल्याने आता खालावलेल्या पाणीपातळीत वाढ होत आहे. कोयना धरणातून पाणी सोडले जात असून सांगलीतही नदीच्या पाणीपातळीत वाढ होत आहे. जलसंपदा विभागाने याबाबत खुलासा दिला असून पात्र कधीच पूर्ण कोरडे पडलेले नसून पाणी पातळी साडेचार फुटांपेक्षा खाली गेलेली नाही असे म्हटले आहे. तसेच पाण्याला दुर्गंधी येणे व पाणी प्रदूषित होणे याबाबी महापालिका व प्रदूषण नियंत्रण मंडळाशी संबंधित आहेत. त्यामुळे जलसंपदाकडून योग्य नियोजन होत असल्याचा दावा त्यांनी एका पत्रकाद्वारे केला आहे. 

कृष्णा नदीची पातळी पूर्ण कोरडी नाही

सांगलीत कृष्णा नदीची पाणीपातळी पूर्ण कोरडी पडलेली नसून शुक्रवारी 6 फुटांवर आली होती. त्यानंतर कोयना धरणातून पाणी सोडले जात आहे. आता पातळी वाढत होत आहे. आज (शनिवारी) पाणीपातळी दहा फुटांपेक्षा अधिक आहे. 
 हणमंत गुणाले, 
अधीक्षक अभियंता, पाटबंधारे विभाग, सांगली.