अंगावर शहारे आणणारे धाडस ; ८० वर्षाचा बहादर लढला बिबट्याशी 

नेर्ले (जि. सांगली) : वेळ दुपारी तीनची. आपल्या शेळीवर बिबट्याने हल्ला केल्यानंतर शेळीला फरफडत नेहणाऱ्या बिबट्यावरच हल्ला करून शेळीचा जीव वाचवणाऱ्या ८० वर्षांच्या भाऊ पांडू जाधव यांचे परिसरात कौतुक होत आहे. अंगावर शहारे आणणारी ही घटना शिराळा तालुक्यातील आरळा परिसरात येसलेवाडी गावात घडली आहे. 

घटनास्थळावरून मिळालेली माहिती अशी, काल सकाळी नेहमीप्रमाणे आरळा डोंगर परिसरात आपल्या शेळ्या व पाळीव जनावरांना चारण्यासाठी घेऊन  येसलेवाडी (ता. शिराळा) येथील शेतकरी भाऊ पांडू जाधव हे निघाले. शेळ्या चरत असताना येसलेवाडी येथील कांदाची मळी येथे दुपारी तीनच्या सुमारास अचानक एका बिबट्याने एका शेळीवर हल्ला चढवला. यात शेळी जखमी झाली. दोन ते तीन मीटर बिबट्याने शेळीला गळ्याला धरुन फरफडत नेले. क्षणाचाही विलंब न करता भाऊ जाधव यांनी धाडसाने आपल्या हातातील काठीने शेळी ओढणाऱ्या बिबट्यावरच हल्ला केला. दोन -चार काट्या बसल्यानंतर भेदरलेल्या बिबट्याने शेळी तेथेच सोडून पळ काढला.

अंगावर काटा आणणारी ही घटना घडल्यानंतर घटनास्थळी लोकांनी धाव घेतली. जीवाची पर्वा न करता ८० वर्षांच्या जाधव यांनी केलेल्या धाडसाचे सर्वत्र कौतुक होत आहे. जखमी शेळीवर उपचार करण्यात आले. आरळा येसलेवाडी पासून चांदोली  अभयारण्य जवळच असल्याने बिबट्यांचा वावर परिसरात वाढला आहे. लोकांनी अनेक वेळा तक्रारी करूनही दुर्लक्ष होत असल्याचे चित्र आहे. बिबट्यांचा बंदोबस्त करावा अशी मागणी दिपक पांडूरंग येसले, सुनिल शिवाजी येसले, संदीप आकाराम येसले, राजु बंडू येसले यांच्यासह शेतकरी वर्गातून होत आहे. जेमतेम ६०० लोकसंख्या असणारे गाव असले तरी बिबट्याच्या हल्ल्याने सध्या जीव मुठीत धरून बसले आहे.

हे पण वाचा - गड्या आपला गावच बरा, असे म्हणत अनेक जण कायमस्वरुपी गावीच थांबण्याच्या मन:स्थितीत

शेळ्या, दुभती जनावरे यांच्यासह येथील लोक बिबट्याच्या भीतीच्या छायेखाली आहेत. बिबट्याचा बंदोबस्त करावा. आज शेळीवर हल्ला झाला, उद्या गावातील लोकांवर हल्ला होईल. वनविभागाने लक्ष द्यावे.

-शंकर तुकाराम येसले, पोलीस पाटील येसलेवाडी.

हे पण वाचा -  घरखर्च चालवायचा कसा ? रायगडावरील रहिवाशांसमोर प्रश्‍न