Gadhinglaj : नेहमी आजीजवळ झोपणाऱ्या अर्जूनला 'त्या' रात्री वडिलांनी बोलावून नेलं अन् रक्ताच्या थारोळ्यात..

गडहिंग्लज : येथील तरुण आणि मनमिळावू उद्योजक संतोष शिंदे (Santosh Shinde) यांनी पत्नी तेजस्विनी व मुलगा अर्जूनसह आत्महत्या केली. या घटनेत सापडलेल्या चिठ्ठीमध्ये एक महिला व तिच्या साथीदाराचे नाव असल्याचे कळताच संतोष यांचे मित्रमंडळी आणि नागरिक संतप्त झाले.

त्यांना अटक करण्याच्या मागणीसाठी शहरातून फेरी मारुन गडहिंग्लज बंदचे आवाहन केले. त्याला व्यावसायिक, उद्योजकांचा प्रतिसाद मिळाला.

दरम्यान, आजोबांचे निधन झाल्यापासून रोज आजीजवळच झोपण्यासाठी असणाऱ्या १५ वर्षीय अर्जूनला शुक्रवारी (ता. २३) रात्री सोबत घेवून झोपायला आई-वडिलांनी वरच्या मजल्यावरील खोलीत नेलं आणि आज सकाळी आई-वडिलांसह अर्जूनही रक्ताच्या थारोळ्यात दिसताच निर्माण झालेली भयाण शांतता नागरिकांची काळीज चिरणारी ठरली.

अर्जून हा यावर्षी दहावीत शिकत होता. शिंदे दाम्पत्याला तो एकुलता मुलगा होता. यामुळे आजी-आजोबाची त्यावर दांडगी माया. आजी त्याला लाडाने ’चिक्कू’ नावाने हाक मारायची. आजोबा वसंत शिंदे यांचे काही महिन्यापूर्वीच निधन झाले. त्यानंतर आजी एकटी झाल्याने अर्जून तेंव्हापासून तिच्याजवळच झोपायचा.

नेमके शुक्रवारीच त्याला झोपण्यासाठी आमच्या सोबत घेवून जात असल्याचे संतोष व पत्नीने त्याच्या आजीला सांगितले. आजी तयार झाली. अर्जूनची आजीजवळ झोपण्याची इच्छा होती. तरीही तो त्या दिवशी आई-वडिलांसोबत झोपण्यासाठी वरच्या खोलीत गेला. सकाळी त्यांना उठवण्यासाठी गेलेल्या शुभमला ही घटना पाहून काय करायचे सुचेना.

रक्ताच्या थारोळ्यात तिघांचेही मृतदेह पाहून तो घाबरुन गेला. सोबत झोपण्यासाठी कधीच अर्जूनला आग्रह न करणार्‍या संतोष व पत्नी तेजस्विनी यांनी नेमके घटनेच्या दिवशीच रात्री त्याला घेवून गेल्याने त्यांनी आधीपासूनच आत्महत्येची मानसिकता तयार केली असावी का, अशी चर्चा या घटनेनंतर नातेवाईक व नागरिकांत सुरु होती. या घटनेने उपस्थित नागरिकांतून हळहळ व्यक्त होत होती.