दारातनं एसटी धावलं ; तवाच कोरोना संपला म्हणायचा !

गडहिंग्लज (कोल्हापूर) - दोन-तीन महिन्यांपूर्वी ध्यानीमनी नसणाऱ्या कोरोनाने ग्रामीण भागातही शिरकाव केला आहे. सुरवातीला अनभिज्ञ असणाऱ्यांच्याही आता तो तोंडी आला आहे. साहजिकच कोरोनाने चर्चेच्या केंद्रस्थानी स्थान मिळविले. ग्रामीण भागात प्रत्येक जण या आजाराचा, घडणाऱ्या घडामोडींचा आणि त्याच्या उच्चाटनाबाबत आपापल्या परीने अंदाज बांधत आहे. एसटी माझ्या दारातनं धावलं, तवाच कोरोना संपला म्हणायचा ही राज्यमार्गाशेजारी राहणाऱ्या एका वृद्धाने व्यक्त केलेली प्रतिक्रियाच सारे काही स्पष्ट करणारी आहे.

संसर्गातून पसरणाऱ्या कोरोनाने विश्‍व व्यापले आहे. ग्रामीण भागातील प्रमाण थोडे कमी आहे, इतकेच काय ते. पण, प्रत्येकाच्या तोंडून कोरोनाच्याच कथा ऐकायला मिळत आहेत. गडहिंग्लज-आजरा मार्गावरील एका गावातील औषधाचे दुकान. औषधे घेण्यासाठी आलेल्यामध्येही कोरोनाचाच विषय. रांगेत उभारलेल्या आजोबांना विचारले. कधी जायचा गा, ह्यो कोरोना. माझ्या दारातनं एसटी धावलं तवाच कोरोना संपला म्हणायचा, हे आजोबांनी दिलेले उत्तर सध्याची परिस्थिती सांगण्यास पुरेसे ठरेल. दारातून रोज धावणाऱ्या बस पाहून सरावलेल्या त्यांच्या नजरेला दीड महिन्यापासून बसचे दर्शन दुर्लभ झाले आहे. त्यामुळेच आयुष्यात प्रथमच असे घडल्याची पुष्टीही त्यांच्याकडून जोडली गेली.

वाचा - गाजराची पुंगी वाजली तर वाजली, नाही तर मोडून खाल्ली...

रस्त्याकडेला एखादे कुत्रे, मांजर पडलेले असेल तर दुर्गंधी येऊ नये म्हणून महिला नाकाला पदर लावत होत्या. पण, आता शेताकडे, दूध घालण्यासाठी जाणाऱ्या महिलाही खबरदारी म्हणून तोंडाला मास्क बांधत आहेत. पण, जनावराचं मुसकं घातल्यासारखं वाटतंय म्हणून पदर बांधत असल्याचे सांगणाऱ्या महिलाही काही कमी नाहीत. कोरोनाने गावच्या सीमा बंद केल्या. त्यामुळे शहरात भाजीपाला विकायला जाणारे आता गावातच गल्लोगल्ली फिरू लागले आहेत. भाजीची बुट्टी डोकीवर ठेवताना "आता माळवं गावातच खपालयं' हे समाधानाने सांगणाऱ्या चेहऱ्याआडचा पाच-दहा रुपये चढ मिळविण्याचा बेरकीपणाही लपेनासा झाला आहे. शेतात कामासाठी जाणाऱ्या महिलात घरात, गावात घडणाऱ्या घटना, टीव्हीवरील मालिकांसोबत कोरोनाचा विषय हमखास चर्चेला येत आहे.