इचलकरंजीच्या विद्यार्थ्यांनी केली इनसर्टसची निर्मिती; आता श्‍वसनाच्या आजाराचा धोका होणार दूर

इचलकरंजी (कोल्हापूर)  :  येथील डीकेटीईच्या टेक्स्टाईल केमिस्ट्रीच्या अंतिम वर्षात शिकत असणाऱ्या विद्यार्थ्यांनी संशोधन करून औषधी गुणधर्म असलेले इनसर्टस विकसित केलेले आहेत.  

मास्कमध्ये या इनसर्टसचा वापर केला तर इनसर्टमधील मायक्रोकॅपसुल्स नियंत्रित प्रमाणात औषधी गुणधर्म बाहेर सोडतात यामुळे श्‍वसनसंस्थे संबंधीत आजारापासून मुक्तता होते.
कोरोनासारख्या महाभयंकर विषाणूपासून प्रतिबंधक उपाय म्हणून करणसिंह पाटील, अक्षय कुलकर्णी, हरीष राज के, सददाम सुतार या विद्यार्थ्यांनी प्रा. सौ. एस.व्ही. चव्हाण यांच्या कुशल मार्गदर्शनाखाली  हा नाविण्यपूर्ण प्रकल्प हाती घेतला .     विद्यार्थ्यांनी मास्कमध्ये वापरता येणा-या औषधी गुणधर्म असलेल्या इनसर्टसची निर्मिती केलेली आहे.

व्हिस्कोस नॉनवोव्हन कापडावर एनकॅप्सुलेशन पध्दतीने निलगिरी तेल व जास्मिन तेल इ. चा वापर करुन हे इनसर्टस बनविले आहे.या गुणकारी इनसर्टसचा वापर हा सर्दी, दमा सारख्या आजारांनी त्रस्त असणा-या रुग्णांसाठी व कोरोना सारख्या विषाणूपासून संरक्षणासाठी देखील करता येवू शकतो. हवेतील वाढते प्रदुषण व विविध विषाणु यामुळे मनुष्याच्या श्‍वसनसंस्थेवर गंभीर परिणाम होत आहेत.  त्यामुळे फेसमास्कचा वापर अनिवार्य बनला आहे.  फेसमास्कच्या वापरामुळे प्रदुषित हवा व धुळीपासून श्‍वसनसंस्थेचे काही प्रमाणात संरक्षण होते अशा मास्कमध्ये या इनसर्टसचा वापर होवू शकतो.

हेही वाचा- रंकाळ्याच्या काठावरचा वैशिष्ट्यपूर्ण ‘लेक व्ह्यू पॅलेस’ -

या औषधी इनसर्टस्ची परिणामकारकता तपासण्यासाठी सर्दी असलेल्या आणि सफाई कामगारांच्या मर्यादित ग्रुपना असे इनसर्टस लावलेले फेसमास्क वापरण्यासाठी दिले गेले. त्यांच्याकडून मत जाणून घेतले. विद्यार्थ्यांनी या पध्दतीचे इनसर्टस बाजारात उपलब्ध असणा-या वोव्हन, निटेड अथवा नॉनवोव्हन मास्कमध्ये वापरले असता श्‍वसनसंस्थेसंबंधीत आजारांवर याचा चांगला परिणाम झाला असलेचा निष्कर्ष त्यांनी काढला. इनसर्टस बनविणा-या सर्व विद्यार्थ्यांना संचालक प्रा.डॉ.पी.व्ही. कडोले व उपसंचालक प्रा.डॉ.यु.जे. पाटील यांचे मार्गदर्शन लाभले.

संपादन- अर्चना बनगे