इचलकरंजी - नदीत ढकलून दिलेल्या 'त्या' बालिकेचा मृतदेह सापडला

हुपरी : यळगुड (ता. हातकणंगले) येथील नराधम सावत्र बापाने इचलकरंजी येथील पंचगंगा नदीत ढकलून दिलेल्या प्रणाली युवराज साळुंखे (वय ९) या बालिकेचा मृतदेह आज सकाळी आढळून आला. (ichalakaranji crime case) इचलकरंजी पालिकेच्या रेस्क्यू पथकाने बोटीतून शोध घेत घाटावरून ढकलून दिलेल्या ठिकाणापासून काही अंतरावर प्रणालीचा मृतदेह सापडला. (police) कौर्याची परिसीमा गाठणाऱ्या या अमानुष घटनेचा सर्व स्तरातून संताप व्यक्त होत आहे. दरम्यान, संशयित आरोपी युवराज आत्माराम साळुंखे याला पोलिसांनी अटक केली आहे. (crime case)

प्रणालीच्या अमानुष खून प्रकरणाचे सकाळी यळगुड येथे संतप्त पडसाद उमटले. ग्रामस्थांनी मोर्चा काढून व रस्त्यावर टायरी पेटवून रास्ता रोको करण्याचा प्रयत्न केला. दरम्यान, पोलिस निरीक्षक राजेंद्र मस्के यांनी फौजफाट्यासह यळगुड येथे धाव घेत लोकांना शांत केले. यावेळी संतप्त ग्रामस्थांनी संशयित आरोपी युवराज आत्माराम साळुंखे याला फाशीची शिक्षा देण्याची मागणी केली. तसेच आरोपीचे कोणत्याही वकिलाने वकीलपत्र न घेण्याची मागणी केली. दरम्यान, गावात पोलिस बंदोबस्त मोठ्या प्रमाणात आहे.