शाब्बास पोरी! ऑस्ट्रेलियातील उच्चशिक्षणासाठी इचलकरंजीच्या कौशिकी जाधवची निवड

इचलकरंजी : येथील ‘डीकेटीई’च्या मेकॅनिकल इंजिनिअरिंग विभागातील कौशिकी जाधव हिची मास्टर ऑफ इंजिनिअरिंग इन मेकॅट्रॉनिक्ससाठी ‘ऑस्ट्रेलियन नॅशनल युनिव्हर्सिटी कॅनबेरा, ऑस्ट्रेलिया’ या नामांकित विद्यापीठात निवड झालेली आहे. विशेष म्हणजे तिला सुमारे ८३ लाख रुपयांची शिष्यवृत्ती केंद्र सरकारमार्फत मिळालेली आहे.

कौशिकीने परदेशात उच्चशिक्षण घेण्यासाठी आवश्यक असणाऱ्या आयएलटीएस परीक्षेत यश संपादन केले आहे. यासाठी आवश्यक असणाऱ्या समकक्ष परीक्षेसाठी ‘डीकेटीई’मध्ये वेळोवेळी तज्ज्ञ प्राध्यापकांचे गेस्ट लेक्चरचे आयोजन केले जाते. मेकॅनिकल इंजिनिअरिंगच्या स्वायत्त अभ्यासक्रमातील मेटॅलर्जी मशिन टूल्स ॲण्ड प्रोसेसिंग, वर्कशॉप प्रॅक्टिस, टूल इंजिनिअरिंग, मेकॅट्रॉनिक्स, हायड्रॉलिक्स, न्यूमॅटिक्स, ऑ‍ॅटोमेशन, रोबोटिक्स, मशिन डिझाईन या विषयांचा तिला या निवडीसाठी फायदा झाला.

संस्थेचे अध्यक्ष कल्लाप्पाण्णा आवाडे, आमदार प्रकाश आवाडे, ट्रेझरर आर. व्ही. केतकर, सचिव डॉ. सपना आवाडे यांनी तिला शुभेच्छा दिल्या. याबाबत संचालक प्रा. डॉ. पी. व्ही. कडोले, मेकॅनिकल इंजिनिअरिंग विभागप्रमुख प्रा. डॉ. व्ही. आर. नाईक, प्रा. आर. डी. पाटील, प्रा. एस. ए. सौंदत्तीकर आदींचे मार्गदर्शन लाभले. निवडीसाठी प्रा. अभय केळकर (कोल्हापूर) यांचे सहकार्य लाभले.