कोल्हापूर - माजी महापौरांचे थेट महापालिकेच्या दारातच अभ्यंगस्नान

कोल्हापूर : पालकमंत्री सतेज पाटील यांनी अनेकदा आश्वासने देऊनही दिवाळीचे अभ्यंगस्नान थेट पाईपलाईनच्या पाण्याने न करता आल्याने माजी महापौर सुनील कदम यांनी महापालिकेच्या दारात पंचगंगा नदीचे बादलीतून आणलेल्या पाण्याने दिवाळीचे अभ्यंगस्नान केले. यावेळी ताराराणी आघाडीचे गटनेते सत्यजित कदम यांच्यासह भाजप ताराराणी आघाडीचे अनेक माजी नगरसेवक उपस्थित होते.

कोल्हापूर शहराला काळम्मावाडी धरणातून थेट पाईपलाईनने पाणी आमच्या योजनेचे काम गेल्या सात वर्षापासून सुरू आहे. यंदाच्या वर्षी हे काम पूर्ण होईल आणि दिवाळीच्या अभ्यंग स्नान थेट पाईप लाईनच्या पाण्याने होईल, असे आश्वासन पालकमंत्री सतेज पाटील यांनी दिले होते. पण यंदाच्या वर्षी हे काम पुर्ण झाले नाही. याची आठवण करून देत माजी महापौर सुनील कदम यानी थेट पाईपलाईनचे पाणी मिळाले नसल्याने पंचगंगेच्या पाण्याने अभंग स्नान केले. यावेळी भाजपचे अजित ठाणेकर, विजय सूर्यवंशी, आशिष ढवळे, वैभव माने, राजसिह शेळके, किरण नकाते आदी उपस्थित होते.

पालकमंत्र्याचा बार फुसका

सुनिल कदम म्हणाले, २०१४ पासून पालकमंत्री सतेज पाटील हे कोल्हापूरच्या जनतेला फसवत आहेत. यंदाच्या वर्षी हे काम पूर्ण होईल, आणि दिवाळीचे अभ्यंगस्नान थेट पाईपलाईनच्या पाण्याने करता येइल, असे आश्‍वासन पालकमंत्री सतेज पाटील यांनी दिले होते. पण हे आश्‍वासन त्यांनी पाळले नाही. त्यामुळे पंचगंगेच्या पाण्याने मी हे स्‍नान करत आहे. कोल्हापूरच्या थेट पाईपलाईनच्या पाण्याचा प्रश्‍न निकालात काढावा, यासाठी आपण हे आंदोलन केले आहे.