कोरोनापेक्षा बेळगाव महापालिका अधिकारी व कर्मचाऱ्यांना आहे यांची धास्ती..

बेळगाव - कोरोनापेक्षा महापालिकेच्या अधिकारी व कर्मचाऱ्यांना भलतीच धास्ती लागली आहे. 1 जुलै पासून बेळगाव महापालिकेचे प्रशासक म्हणून कोणाची नियुक्‍ती होणार याची धास्ती त्यांना आहे. सध्या जिल्हाधिकारी डॉ. एस. बी. बोमनहळ्ळी हे महापालिकेचे प्रशासक आहेत. पण ते 30 जून रोजी निवृत्त होणार आहेत. त्यांच्या निवृत्तीमुळे महापालिकेत नव्या प्रशासकांची नियुक्ती होणार आहे. प्रादेशिक आयुक्त आमलान बिश्‍वास याना पुन्हा पालिका प्रशासक म्हणून नियुक्त केले जाण्याची शक्‍यता आहे. पण बिश्‍वास यांची प्रशासक म्हणून नियुक्ती होवू नये यासाठी महापालिकेच्या अधिकारी व कर्मचाऱ्यानी देव पाण्यात घातले आहेत.

वाचा - कोरोनासह जगायची सवय लावायला हवी...

लोकनियुक्त सभागृह नसल्यामुळे 15 मार्च 2019 पासून बेळगाव महापालिकेवर प्रशासक नियुक्त करण्यात आले आहेत. महापालिकेतील लोकनियुक्त सभागृहाचा कार्यकाळ संपला की तेथे संबंधित जिल्हाधिकाऱ्यांची प्रशासक म्हणून नियुक्ती केली जात होती. पण 2019 साली राज्यशासनाने थेट प्रादेशिक आयुक्तांचीच प्रशासक म्हणून नियुक्ती केली. शासनाच्या या निर्णयाची त्यावेळी जोरदार चर्चाही झाली होती. प्रारंभी तुषार गिरीनाथ, त्यानंतर दीपा चोळण व पी. ए. मेघण्णावर यानी महापालिका प्रशासक म्हणून कामकाज केले. मेघण्णावर यांच्या निवृत्तीनंतर आमलान बिश्‍वास यांची प्रशासक म्हणून नियुक्ती झाली. बिश्‍वास यानी सुमारे सहा महिने प्रशासक म्हणून कामकाज केले, पण या सहा महिन्यात पालिकेच्या अधिकाऱ्यांना व कर्मचाऱ्यांना सळो की पळो करून सोडले. महापालिकेत वारंवार आढावा बैठक घेवून पालिकेच्या कामकाजाचा पंचनामाच केला. स्मार्ट सिटी योजनेच्या कामांवरही त्यानी सातत्याने ताशेरे ओढले. त्यामुळे पालिका आयुक्त के. एच. जगदीश यांच्यासह अधिकारी व कर्मचाऱ्यांनी बिश्‍वास यांची धास्तीच घेतली होती. आढावा बैठकीत अधिकाऱ्यांची झाडाझडती घेण्याच्या त्यांच्या अनोख्या 'स्टाईल'मुळे काहीनी बैठकीला गैरहजर राहण्यास सुरूवात केली. महापालिकेकडून शहर स्वच्छता व घनकचऱ्यावर होणारा खर्च, प्रत्यक्षात चालणारे स्वच्छतेचे काम यावर तर त्यानी आरोग्य विभागाच्या कामकाजाचा पंचनामा केला. त्यातून मग तत्कालीन पालिका आरोग्याधिकारी डॉ. शशीधर नाडगौडा यांची त्यांच्या मूळ खात्यात बदली झाली.

वाचा - मराठा बॅंकेचे माजी अध्यक्ष,जिल्हा मध्यवर्ती बॅंकेचे माजी सरव्यवस्थापक एन. वाय. पाटील यांचे अपघाती निधन

सात जिल्ह्यांची जबाबदारी असलेले बिश्‍वास हे बेळगाव व हुबळी-धारवाड या दोन्ही महापालिकांमध्ये प्रशासक होते. पण बिश्‍वास यांच्या कामकाजावर बेळगावचे लोकप्रतिनिधी नाराज होते. त्यामुळे मग बिश्‍वास यांना प्रशासकपदावरून हटविण्याच्या हालचाली सुरू झाल्या. त्या हालचाली यशस्वी झाल्या व त्याना बेळगाव महापालिकेच्या प्रशासक पदावरून हटविण्यात आले. पण हुबळी-धारवाड महापालिका प्रशासकपदी कायम ठेवण्यात आले. प्रशासक असताना बिश्‍वास यानी बेळगाव महापालिकेबाबत अनेक महत्वाचे निर्णय घेतले होते. त्यांना हटविल्यानंतर महापालिकेने त्या निर्णयांची अंमलबजावणी केली नव्हती. आता ते पुन्हा आले तर त्या निर्णयांच्या अंमलबजावणीचा आढावा घेणार हे नक्की आहे. त्यामुळेच अधिकाऱ्यांची धास्ती वाढली आहे.