अधिकाऱ्यालाच बंधाऱ्याच्या पिलरला दोरीने घातले बांधून; पाच जणांविरुद्ध गुन्हा दाखल

कुरुंदवाड (कोल्हापूर) :तेरवाड ता.शिरोळ बंधाऱ्यावर पंचगंगा नदीतील प्रदूषित पाण्याचे नमुने व मृत माशांचा पंचनामा करण्यासाठी आलेल्या प्रदूषण नियंत्रण मंडळाच्या  अधिकाऱ्याला दोरीने बांधून घालून शासकीय कामात अडथळा निर्माण केलेप्रकरणी विश्वास बालीघाटे (रा. शिरढोण, ता.शिरोळ)बंडू पाटील (रा.हेरवाड,ता.शिरोळ)व अज्ञात तीन अशा पाच जणांविरुद्ध येथील पोलिसात गुन्हा दाखल करण्यात आला आहे. फिर्याद प्रदूषण नियंत्रण मंडळाचे क्षेत्र अधिकारी सचिन जनार्दन हरबड यांनी दिली आहे.

 पंचगंगा नदीपात्रात प्रदूषित पाणी आले आहे.मासे मृत झालेबाबत वृत्त प्रसिद्ध झाले आहे.बंधाऱ्यावर पाहणी करून पाण्याचे नमुने तपासणीसाठी संकलित करा असा आदेश प्रदूषण मंडळाचे संजय मोरे यांनी क्षेत्रीय अधिकारी हरबड यांना दिला होता.

हेही वाचा- कोल्हापूर : शेंडापार्कातील झाडांची बहरण्याआधीच झाली राख! -

बुधवारी दुपारी तीन वाजता हरबड यांनी बंधाऱ्या जवळील पाण्याचे नमुने घेऊन मृत माशांचा पंचनामा करून जात असताना विश्वास बलिघाटे,बंडू पाटील व अज्ञात तीन अशा पाच जणांनी क्षेत्रीय अधिकारी हरबड यांना बंधाऱ्याच्या पिलरला बांधून घालून पाणी प्रदूषित करणाऱ्या घटकावर कारवाई केल्या शिवाय सोडणार नाही अशी भूमिका घेतल्याने प्रशासकीय अधिकाऱ्यांना बांधून घालून शासकीय कामात अडथळा निर्माण केले प्रकरणी गुन्हा दाखल करण्यात आला आहे.

संपादन- अर्चना बनगे