'मुंबई, पुणे, सातारा शहराच्या धर्तीवर कोल्हापुरातही स्वतंत्र कोविड सेंटर उभारावे' 

कोल्हापूर - मुंबई, पुणे, सातारा शहरांच्या धर्तीवर कोल्हापूर शहरात स्वतंत्र सुसज्ज कोव्हीड सेंटर उभे करावे, अशा मागणीचे निवेदन राज्य नियोजन मंडळाचे कार्यकारी अध्यक्ष राजेश क्षीरसागर यांनी ई-मेल द्वारे मुख्यमंत्री उद्धवजी ठाकरे यांना सादर केले. 

शहरासह जिल्ह्यात कोरोना संसर्ग व मृत्यूदर झपाट्याने वाढत असून, उपचाराविना अनेक रुग्णांना जीव गमवावा लागत आहे. कोल्हापूर जिल्ह्यातील परिस्थिती नियंत्रणात ठेवण्यासाठी प्रशासनावर मर्यादा येत असल्यामुळे ही मागणी केली आहे. 

निवेदनात म्हटले आहे, की मार्च, एप्रिल, मे महिन्यात आटोक्‍यात असणारी परिस्थिती सध्या आटोक्‍याबाहेर गेल्याचे दिसत आहे. वाढती रुग्णसंख्या आणि उपचार केंद्रांची कमतरता यामुळे कोल्हापूर जिल्ह्यात अनेक रुग्ण उपचारा अभावी दगावत आहेत. वाढती रुग्ण संख्या आटोक्‍यात आणण्याकरिता योग्य उपाययोजना करण्याबाबत वेळोवेळी प्रशासनासोबत बैठका घेवून सूचना केल्या आहेत. नियोजनबद्ध यंत्रणेतून कोरोना रुग्णसंख्या आटोक्‍यात आणण्यास मदत होणार आहे. राज्यातील मुंबई, पुणे आदी शहरांमध्ये प्रशासनाच्या नियोजनामुळे परिस्थिती आटोक्‍यात आली आहे. 

मुंबई, पुणे आदी शहरांमध्ये कोरोना रुग्णसंख्या नियंत्रणात आणण्यासाठी राज्य शासनाने स्वतंत्र कोरोना (कोविड) सेंटर उभारले आहेत. त्याचप्रमाणे सातारा शहरातही अशाच पद्धतीचे कोविड सेंटर उभारण्यास शासनाने मंजुरी दिली असून, त्याच्या उभारणीचे काम तातडीने सुरु होत आहे. 

हे पण वाचा - कोल्हापूरमध्ये कडक लॉकडाऊन नाही : पालकमंत्री

कोल्हापूर जिल्ह्यात वाढता संसर्ग पाहता सी.पी.आर. सह इतर रुग्णालयांवर असणारा रुग्णसेवेचा ताण पाहता स्वतंत्र कोविड सेंटर उभारणे गरजेचे आहे. कोल्हापुरातील कोरोना संसर्ग नियंत्रणात आणण्याकरिता मुंबई, पुणे, सातारा शहराच्या धर्तीवर शहरात स्वतंत्र कोविड सेंटर उभारण्यास परवानगी देवून त्यास निधी मंजूर व्हावा. 

हे पण वाचा - राज्यात उद्यापासून ई-पास रद्द ; 'हे' राहणार बंद अन् 'हे' राहणार सुरू

 .

संपादन - धनाजी सुर्वे