Kolhapur Corporation : ९२ नगरसेवक बसणार कुठे?

कोल्हापूर : महापालिकेच्या सभागृहात यापुढे ९२ नगरसेवक असणार आहेत. सध्याची इमारत आणि सभागृह हे अपुरे असून ९२ नगरसेवकांना बसायला सभागृहात जागा मिळणार नाही, अशी परिस्थिती आहे. महापालिकेच्या हद्दवाढीचा विषय गाजत असताना हद्दवाढ बाजूलाच राहिली; पण आहे त्या हद्दीतील नगरसेवकांना बसायला सभागृहात जागा मिळणार नाही.

५० वर्षे झाली तरी हद्दवाढ नाही. महानगरपालिकेच्या मुख्य कार्यालयासाठी प्रशस्त जागाही नाही. पूर्वीच्या महात्मा गांधी मार्केटच्या इमारतीतच आजही मुख्य कार्यालय आहे. इतक्या वर्षात मुख्य इमारतीसाठी जागा ही, नाही आणि निधीही नाही. शहरात जिल्हा परिषदेची प्रशस्त जागा आणि इमारत आहे. न्यायालयाची प्रशस्त जागा आणि इमारत आहे. जिल्हाधिकारी कार्यालयही प्रशस्त झाले आहे. त्यासोबतच मध्यवर्ती प्रशासकीय कार्यालयाची इमारत मोठी आहे. पोलिस मुख्यालय, जिल्हा पोलिस प्रमुख कार्यालय मोठ्या आणि प्रशस्त इमारतीत आहे. शहरात महापालिकेच्या अनेक जागा असताना मुख्य इमारतीसाठी मात्र अजून जागा निश्चित नाही. सध्याचे मुख्य कार्यालय बाजारगेट परिसरात आहे. वाहतुकीची कोंडी येथे प्रचंड होतो. स्वतंत्र पार्किंग व्यवस्था नाही.

मुख्य इमातीत अधिकारी आणि पदाधिकारी यांच्या कक्षासाठी नीट जागा नाही. सभागृह अपुरे पडते. अधिकारी आणि नगरसेवक यांच्यावर सभेसाठी अडचणीत बसायची वेळ येते. महापौरांना डायसवर जाताना अडचणीतून मार्ग काढावा लागतो. नगरसचिव आणि आयुक्तांना सभा होईपर्यंत, अडचणीतच बसावे लागते. अशातच आता ११ नगरसेवक वाढले आहेत. निवडणूक येत्या दोन चार महिन्यांत केव्हाही होईल. निवडणुकीनंतर ज्यावेळी पहिल्या महापौर पदासाठी निवडणूक होईल, त्या निवडणुकीसाठी ९२ नगरसेवकांना बसवायचे कोठे? असा प्रश्न उपस्थित होणार आहे.

सध्यस्थिती अशी

• एकूण मतदारसंख्या ४ लाख ६९ हजार,९६४

• नवमतदारात ५ वर्षात २० हजारांनी वाढ

• एका प्रभागांत २० हजार ३४२ लोकसंख्या

• एका प्रभागांत १७ हजार ४०६ मतदारसंख्या

• २०१५ च्या तुलनेत ९४८३ मतदारांची वाढ

महापालिका निवडणूक २०२२

• २०११ साली झालेल्या जनगणनेनुसारची लोकसंख्या

• ५ लाख ४९ हजार २३६

• प्रभागसंख्या- ३०, नगरसेवक -९२

महापालिका स्थापनेपासून नगरसेवक असे

नगरपालिकेचे १९७२ ला महापालिकेत रूपांतर

वर्ष नगरसेवक संख्या

१९७८ - ६०

२००० - ७२

२००५ - ७२

२०१५ - ८१

२०२१ (नव्या निर्णयानुसार) ९२

संभाव्य आरक्षण : महिला नगरसेवक- ४६ इतर मागास नगरसेवक - २५ अनूसूचित जाती नगरसेवक - १२