हातकणंगले : विवाह नोंदणीचा दाखला देण्याकरीता लाच घेणाऱ्यास अटक

हातकणंगले : विवाह नोंदणीचा दाखला देण्याकरीता तीन हजार रुपयांची लाच स्विकारताना हातकणंगले ग्रामीण रुग्णालयातील कनिष्ठ लिपिक सुधीर अमितचंद चौधरी ( व.व.४५ )रा. रूक्मिणी हाऊसिंग सोसायटी, संजयनगर, सांगली व त्याचे खाजगी हस्तक सचिन शिवाजी भोसले (व.व.२६ ) रा. नेज आणि सौरभ अरविंद नेर्ले. ( व.व.२४ )रा.नेज यांना आज लाचलुचपत विभागच्या पथकाने सापळा रचून रंगेहाथ पकडले. याबाबतची तक्रार पृथ्वीराज पाटील ( वय २७ ) रा. हातकणंगले याने दिली होती.पंधरा दिवसांत हातकणंगलेतील ही दुसरी कारवाई असून ग्रामीण रुग्णालयांतील ही पहिलीच घटना असल्याने वैदयकिय क्षेत्रांत खळबळ उडाली आहे.

अधिक माहिती अशी, हातकणंगले येथील ग्रामीण रुग्णालयांमध्ये सुधीर चौधरी हा तीनच महिन्यांपूर्वी कनिष्ठ लिपिक म्हणून रुजू झाला आहे. त्याच्याकडे विवाह नोंदणीचे काम होते. मात्र हजर झाल्यापासून त्याच्या बाबत तक्रारी होत्या. यातील तक्रारदाराची विवाह नोंद करून त्यावरील दाखला देण्यासाठी तक्रारदाराकडून रूपये तीन हजारची लाच मागणी केली होती. याबाबत लाचलुचपत विभागांकडे तक्रार आल्यानंतर त्यांनी २२ तारखेपासून आजवर पाच ते सहा वेळा सापळा लावला. अखेर आज ते तिघेही जाळ्यात सापडले. सदर लाचेची रक्कम स्वीकारताना सुधीर चौधरी सह सचिन भोसले आणि सौरभ नर्ले या दोन खाजगी एजंटांना लाचलुचपत विभागाने आज रंगेहाथ पकडले. ही कारवाई आज बुधवारी दुपारी करण्यात आली.

पो.उपअधीक्षक आदीनाथ बुधवंत यांच्‍या मार्गदर्शनाखाली पो.कॉ. संजीव बंबरगेकर, पो.ना. विकास माने, सुनिल घोसाळकर, पो.कॉ. रुपेश माने,चालक पो. शि. सुरज अपराध. आदींनी ही कारवाई केली.