कोल्हापूर ; कळंबा कारागृह प्रशासन सतर्क 

कोल्हापूर - टेनिसबॉलमधून कळंबा कारागृहात गांजा पोहचविण्याचा प्रयत्न झाल्यानंतर कारागृह प्रशासन अधिक सर्तक झाले आहे. गांजा ज्याच्या पर्यंत पोहचविण्यात येणार होता. त्याचे नाव पुढे आले असून त्याच्याकडे प्रशासन चौकशी करत आहे. 

कळंबा मध्यवर्ती कारागृहाच्या उत्तरेकडील बाजूने कारागृहात गांजा पोहचविण्याचा प्रयत्न करणाऱ्या पुण्यातील तिघा संशयितांना जुना राजवाडा पोलिसांनी मंगळवारी अटक केली. अमित पायगुडे, वैभव कोठारी, संदेश देशमुख असे हे तिघे पुण्यातील आहेत. कारागृहात मित्राच्या भावासाठी गांजा पोहचविण्याच्या ते तिघे तयारीत होते. त्यासाठी त्यांनी टेनिसबॉलचे चेंडू कापून त्यात गांजा भरला होता. त्यानंतर ते बॉल चिकटपट्टीच्या सहायाने चिकटवले होते. क्रिकेट खेळत असल्याचे भासवून बॉलिंग करण्याच्या बहाण्याने ते हे चेंडू कारागृहात फेकण्याच्या तयारीत होते. अशी माहिती पुढे आली. त्यानुसार तातडीने कारागृहातील सर्व सीसी टीव्ही तपासण्यात आले. ज्या मित्राच्या भावासाठी तिघा संशयितांचा प्रताप सुरू होता. त्या बंदीकडेही चौकशी सुरू आहे. त्याचबरोबर कारागृहातील संपूर्ण परिसराची पहाणी करण्यात आली. त्यात अशा पद्धतीचा बॉल कोठे पडला आहे का? हे पाहण्यात आले. पण तशी कोणतीही गोष्ट मिळून आली नाही. तरीही संपूर्ण यंत्रणेला सतर्क राहण्याचे आदेश देण्यात आले असल्याचे अधीक्षक शरद शेळके यांनी सांगितले. 

हे पण वाचा - मतदान नाही म्हणून रस्ता नाही

कारागृहाचा परिसर मोठा आहे. कारागृहात येणारे गांजा भरलेले टेनिसबॉल सफाई करणाऱ्या एखाद्या बंदीला हाताशी धरून प्राप्त करण्याचा प्रयत्न केला जाणार होता का? याबाबतचीही चौकशी प्रशासनाकडून सुरू आहे. 

संपादन - धनाजी सुर्वे