कोल्हापूर : पंचगंगा नदीच्या पुराचे पाणी आखरी रस्त्यावर | Sakal
sakal

बोलून बातमी शोधा

kolhapur

कोल्हापूर : पंचगंगा नदीच्या पुराचे पाणी आखरी रस्त्यावर

कोल्हापूर : पंचगंगा नदीच्या पुराचे पाणी आज गंगावेश ते पंचगंगा स्मशानभूमी रस्त्यावर आले. गायकवाड वाड्यापर्यंत पाणी आले आहे. त्यामुळे हा मार्ग वाहतुकीसाठी बंद केला. दिवसभर शहरात कमी-जास्त प्रमाणात पाऊस सुरूच होता. त्यामुळे नदीकाठी राहाणाऱ्यांना सतर्कतेचा इशारा दिला आहे.

कमी अधिक प्रमाणात दिवसभर पाऊस सुरूच होता. धरणक्षेत्रातही जोरदार पाऊस झाल्याने नदीच्या पाणी पातळीत वाढ झाली. सायंकाळी ४ वाजेपर्यंत राजाराम बंधारा येथे नदीची पातळी ३७ फूट ४ इंच इतकी होती. पंचगंगा नदीचे पाणी दोन दिवसांपूर्वी पात्राबाहेर पडले आहे. आज गंगावेश ते पंचगंगा स्मशानभूमी या आखरी रस्त्यावर पाणी आले. गायकवाड वाड्याच्या भिंतीला पाणी लागले आहे. संभाव्य धोका लक्षात घेऊन पोलिस प्रशासनाने पंचगंगा तालीम आणि शिवाजी पूल चौक येथे बॅरिकेडस्‌ लावून हा रस्ता वाहतुकीसाठी बंद केला. येथे पोलिसांनी बंदोबस्तही लावला आहे.

अद्याप जुन्या शिवाजी पुलावरून वाहतूक सुरू आहे. नदीचे पाणी आसपासच्या परिसरात पसरल्याने पूरजन्यस्थिती उद्भवली आहे. नदीचे हे अथांग रूप पाहण्यासाठी नागरिक येथील पिकनिक पॉइंटच्या बागेत येत आहेत. राजाराम बंधारा परिसरात पूर पाहण्यासाठी नागरिकांनी गर्दी केली होती. दरम्यान, आज पावसात सातत्य असल्याने पूरग्रस्त भागात नागरिकांना सतर्क राहण्याची सूचना प्रशासनाने दिली आहे. अग्निशमन दलाच्या अधिकाऱ्यांची गस्त या भागात सुरू आहे.

गाडीने घेतला पेट

शिवाजी विद्यापीठासमोर कोल्हापूर-कागल रस्त्याजवळ एका चारचाकी गाडीने अचानक पेट घेतला. अग्निशमन दलाच्या जवानांनी तेथे जावून ही आग आटोक्यात आणली. दुपारी २.१५ वाजता ही घटना घडली. यामध्ये कोणतीही जीवितहानी झाली नाही. मात्र, गाडीचे सुमारे ४० ते ५० लाखांचे नुकसान झाले. शॉर्टसर्किटमुळे ही आग लागल्याचा अंदाज आहे.

क्षीरसागर घेणार आज आढावा

कोल्हापूर : संभाव्य पूरस्थिती संदर्भात आपत्कालीन व्यवस्थापनाचा आढावा राज्य नियोजन मंडळाचे कार्यकारी अध्यक्ष राजेश क्षीरसागर उद्या (ता. १५) घेणार आहेत. जिल्हाधिकारी कार्यालयात दुपारी एक वाजता बैठक होईल

झाड उन्मळून पडले

येथील रुइकर कॉलनी भागात एक झाड उन्मळून पडले. याबाबतची वर्दी येथील नागरिकांनी अग्निशमन दलाला दिली. त्यानंतर अग्निशमनच्या जवानांनी झाड कापून बाजूला केले. यामध्ये कोणतेही नुकसान झाले नाही. पापाची तिकटी येथे शॉर्टसर्किट होण्याची घटना घडली. मात्र, यात कोणतेही नुकसान झाले नाही.

Web Title: Kolhapur Panchganga River Flood Water

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..