Kolhapur : UDID कार्ड वाटप शिक्षकांच्या माथी

कोल्हापूर : दिव्यांग व्यक्तींचे यूडीआयडी कार्ड वाटपाचे काम दिव्यांग शाळांतील शिक्षकांना दिले आहे. त्यामुळे राज्यभरातील दिव्यांग शाळा शिक्षकांकडून नाराजी व्यक्त होत आहे. सहामाही परीक्षा काळात अध्यापनाचे काम सोडून दिव्यांग शाळा शिक्षकांनी यूडीआयडी कार्य वाटपासाठी गावभर फिरण्याची वेळ आली आहे, यातील विशेष असे की, दिव्यांग कल्याण आयुक्त कार्यालयाचे कोणतेही आदेश नसताना समाजकल्याण अधिकाऱ्यांनी केवळ व्हाटस्‌अप आदेशाद्वारे कार्ड वाटपाची सक्ती केली, असे आदेश पाळावेत कसे, असा प्रश्न शिक्षक विचारत आहे. याबाबत कास्‍ट्राईब दिव्यांग शिक्षक शिक्षकेतर संघटनेने आंदोलनाचा इशारा दिला आहे.

दिव्यांग व्यक्तींना यूडीआयडी कार्ड देण्यात येते. हे कार्ड बंगळूर येथील संस्थेत प्रिंट होऊन पुन्हा जिल्हा शासकीय रुग्णालयात येते. तेथून हे कार्ड पोस्टाद्वारे संबंधित दिव्यांग व्यक्तीच्या घरी पोहचवले जाते, अशी कार्यपद्धती आहे, मात्र गेल्या आठवडाभरापासून राज्यातील बहुतेक समाजकल्याण अधिकाऱ्यांनी दिव्यांग शाळा शिक्षकांना आदेश दिले. शिक्षकाने तालुक्यातील दिव्यांग व्यक्तींचे घर शोधून त्यांच्या घरी ही कार्ड द्यावीत, त्याचा फोटोही घ्यावा, असे लेखी पत्राद्वारे न देता व्हाटस्‌अप संदेशाद्वारे दिले.

याबाबत काही शिक्षकांनी दिव्यांग आयुक्त कार्यालय (पुणे) यांच्याकडे विचारणा केली, मात्र दिव्यांग आयुक्तांनी शिक्षकांनी कार्ड वाटावीत, असे आदेश दिलेले नाहीत, असे सांगितले. दिव्यांग शाळात सध्‍या सहामाही परीक्षेचा अभ्यासक्रम सुरू आहे. याच वेळी यूडीआयडी कार्ड वाटपाचे कारण सांगत शिक्षक अध्यापन सोडून शाळेतून दुपारीच बाहेर पडतात. त्यामुळे दिव्यांगांच्या अध्यापनाला फटका बसत आहे.