विषयच हार्ड! कोल्हापुरात भरले 100 खड्ड्यांचे फोटो प्रदर्शन

कोल्हापूर : शहरातील रस्त्यांची दुरावस्था झाली आहे. याच पार्श्वभूमीवर मृत्यूचे सापळे बनलेल्या शहरातील 100 खड्ड्यांच्या फोटोंचे खुले प्रदर्शन दसरा चौकात भरवण्यात करण्यात आले होते. जनसंघर्ष सेनेकडून आयोजित या प्रदर्शनातून यावेळी महापालिकेच्या रस्त्याच्या निकृष्ट कामाचा निषेध करण्यात आला. शहरातील शाहूपुरी, राजारामपुरी, मध्यवर्ती बसस्थानक, ताराबाई पार्क उपनगरातील प्रमुख रस्त्यांची अवस्था वाईट झाली आहे. कोट्यावधी रुपये खर्चूनही रस्त्यांची परिस्थिती तशीच आहे. रस्त्यांची दुरावस्था असतानाही कोणतीही उपाययोजना केली जात नसल्याने हे प्रदर्शन भरवण्यात आले. दसरा चौकात भरलेल्या या प्रदर्शनाला शहरवासीयांनी फोटो पाहण्यासाठी मोठी गर्दी केली होती.

प्रदर्शनाच्या माध्यमातून रस्त्यांची दुरवस्था प्रशासनाच्या निदर्शनास आणून दिली असून पंधरा दिवसात प्रशासनाकडून रस्त्यांच्या कामाबाबत कार्यवाही न झाल्यास महापालिकेत आयुक्त कार्यालयात ५०० फोटोंचे प्रदर्शन भरवण्यात येणार असल्याची माहिती जनसंघर्ष सेनेचे जिल्हाध्यक्ष शुभम शिरहट्टी यांनी यावेळी दिली. जनसंघर्ष सेनेचे सुनील थोरवत, संदेश पोलादे, सतीश कदम, वैभव पाटील,संग्राम जाधव, प्रथमेश पोवार, यश पोवार, अक्षय कांबळे, मूबीन मुश्रीफ, प्रथमेश मुळीक, राजस जोशी, हर्षद पडवळ, अमित चव्हाण, मितेश संकपाळ, मयूर संकपाळ आदी यावेळी उपस्थित होते.