पट्टणकोडोली - यंदा राज्यात भरपूर पाऊस; 'विठ्ठल बिरदेव यात्रेत भाकणूक

पट्टणकोडोली - 'विठ्ठल बिरदेवाच्या नावानं चांगभलं'चा गजर करत मोठ्या भक्तीमय वातावरणात पट्टणकोडोली (ता.हातकणंगले) येथील प्रसिद्ध श्री. विठ्ठल बिरदेवाच्या यात्रेस प्रारंभ झाला. आज सकाळी परंपरेनुसार विधिवत कार्यक्रमांना सुरवात झाली. मानाच्या दुधारी तलवारींचे गावच्या वाडीत पुजन करण्यात आले. प्रकाश पाटील रणजित पाटील, श्री. जोशी, श्री. आवटे, श्री. गावडे, श्री. कुलकर्णी, श्री. चौगुले आदी मानकरी आणि धनगर समाज पंच मंडळींनी फरांडेबाबांना भेटून मंदिरात येण्याचे निमंत्रण दिले.

हे निमंत्रणं स्विकारुन फरांडेबाबा मानाच्या दगडी गादीवरुन उठले. फरांडेबाबांनी हेडाम नृत्य केले. यावेळी जमलेल्यांनी त्यांच्या अंगावर भंडारा, खारिक-खोबरे, बाळ लोकर यांची उधळण केली. टनाच्या हिशोबात पडणारा भंडारा यंदाही कोरोनामुळे थांबला असे वाटत असताना फरांडेबाबांच्या हेडामवेळी भाविकांनी केलेल्या भंडाऱ्याच्या प्रचंड उधळणीने आसमंत पिवळा धमक झाला होता.

या यात्रेत सात दिवसात पाऊस पडेल. रोहिणीचा पाउस, मृगाचा पेरा होईल. खळ्याकाठी दोन सव्वा दोन पिकेलं. तांबड धान्य कडक होईल. कानानं ऐकालं पण डोळ्यांनी पहाणार नाही अशी रोगराई संदर्भातील तर माझी सेवा करशीला तर खाशीला मेवा, कांबळ्याखाली घेईन, अशी भाकणूक केली आहे.

दरम्यान कोणतीही प्रकारची दुकाने, खेळणी-पाळणे यांना बंदी घातल्यानं गोंधळ थांबला होता. भाविकांनी रात्रभर धनगरी ओव्यांचे कार्यक्रम चालु ठेवले होते. मंदिर परिसरा भोवती बॅरिकेट्स लावून पोलिस फाटा तैनात करण्यात आला आहे. भाविकांनाही दर्शन रांगेतून दर्शनासाठी सोडण्यात येत आहे.