'सरकारमुळे आरक्षणासाठी मराठा समाजावर पुन्हा आंदोलनाची वेळ'

कोल्हापूर : मराठा आरक्षण प्रश्नी (maratha reservation) सरकार कमी पडल्याने मराठा समाजावर पुन्हा आंदोलनाची वेळ आल्याची माहिती वंचित बहुजन विकास आघाडीचे अध्यक्ष ॲड. प्रकाश आंबेडकर (prakash ambedkar) यांनी पत्रकारांना दिली. सकल मराठा समाजातर्फे खासदार युवराज संभाजीराजे छत्रपती (sambhaji raje) यांच्या नेतृत्वाखाली कोल्हापुरात मूक आंदोलन झाले. नर्सरी बागेतील राजर्षी छत्रपती शाहू महाराज समाधी स्मारक परिसरात त्याचे आयोजन केले होते. त्या आंदोलनात ॲड. आंबेडकर यांनी सहभाग घेत मराठा आरक्षणाला पाठिंबा व्यक्त केला.

ॲड. आंबेडकर म्हणाले, 'मराठा समाजाला आरक्षण मिळविण्यात सरकार कमी पडले. त्याबाबत मी सरकारला दोष देतो. सरकारने योग्यरित्या बाजू मांडली असती तर मराठा समाजावर पुन्हा आंदोलन करण्याची वेळ आली नसती. मराठा आरक्षणाला माझा पाठिंबा असून, समाजाला आरक्षण मिळालेच पाहिजे, ही माझी भूमिका आहे.' तत्पूर्वी, ॲड. आंबेडकर यांनी राजर्षी छत्रपती शाहू महाराज यांच्या समाधी स्मारकास अभिवादन केले. भर पावसात आंदोलनात सहभागी होत मराठा समाजाला आरक्षण मिळाले पाहिजे, अशी मागणी केली.