राऊतवाडी धबधबा रस्ता पत्रे ठोकून "सील' 

राधानगरी :  वर्षा पर्यटन बंदीच्या निर्णयानंतर आता पडळी ग्रामपंचायत आणि स्थानिक समितीने राऊतवाडी धबधबा क्षेत्र सील केले आहे. धबधबा स्थळाकडे प्रवेश करण्यासाठीचा रस्ता पत्रे ठोकून बंद करण्यात आला आहे. धबधबा क्षेत्र प्रतिबंधित झाल्याने पर्यटकांच्या प्रवेशावर काटेकोर निर्बंध लागू झाले आहेत. त्यामुळे यंदाच्या पावसाळ्यात धबधबा अज्ञात वासातच राहणार आहे. 

कोरोना संकटकाळात पर्यटक गर्दीचे नियंत्रण जिकरीचे आणि सुरक्षित अंतराच्या नियम पाळण्याची शक्‍यता नसल्याने पर्यटक आरोग्याच्या दृष्टीने जोखमीचे ठरणार ही वस्तुस्थिती अभ्यासून गेल्या आठवड्यातील महसूल, पोलिस व स्थानिक समितीच्या संयुक्त बैठकीत धबधबा स्थळावर पर्यटक बंदीचा निर्णय झाला. 

प्रशासनाच्या निर्देशानुसार स्थानिक समितीने धबधबा स्थळाकडे जाणारा रस्ताच बंद केला. त्याचबरोबर पायवाटाही बंद केल्या आहेत. धबधबा स्थळांकडे जाणाऱ्या रस्त्यावर हत्तीमहाल व पडळी प्रवेश कर वसुली नाक्‍याच्या ठिकाणी पर्यटक प्रवेश बंदीचे फलकही लावण्यात आले आहेत. यंदाच्या पावसाळ्यात वर्षा पर्यटनाला पूर्ण मज्जावच झाला आहे. दरम्यान, राधानगरीसह काळम्मावाडी, तुळशी, वलवण धरण क्षेत्रातही वर्षा पर्यटनावर जलसंपदा विभागाने निर्बंध घातले आहेत. 

प्रवेश बंदीचे उल्लंघन करून धबधबा स्थळी येणाऱ्या पर्यटकांची वाहने जप्त करण्यात येतील. किमान सहा महिने जप्त वाहने परत दिली जाणार नाहीत. संबंधित पर्यटकांवर गुन्हा दाखल होईल. धबधबा क्षेत्रात प्रवेश करण्याचा प्रयत्न करणाऱ्या पर्यटकांवर स्थानिक समितीची करडी नजर राहील प्रसंगी पोलिस गस्ती पथकही तैनात करण्यात येईल. 
उदय डुबल, पोलिस निरीक्षक, राधानगरी 

दृष्टिक्षेप 
- पडळी ग्रामपंचायत समितीकडून कार्यवाही 
- धबधब्याकडे जाणाऱ्या पायवाटाही बंद 
- हत्ती महाल, पडळी प्रवेश कर वसुली नाक्‍यावर बंदीचे फलक 
- काळम्मावाडी, तुळशी, वलवण धरण क्षेत्रातही निर्बंध