सैन्यदलात सुभेदारपदी पदोन्नती झालेल्या कुमार कांबळे यांची बोरवडेत मिरवणूक

3169
बोरवडे : येथे सुभेदार कुमार कांबळे यांचा सत्कार करताना एस. पी. पाटील व शिक्षक.
..........
सुभेदार कुमार कांबळे यांची
बोरवडे ग्रामस्थांतर्फे मिरवणूक

बिद्री : भारतीय सैन्य दलात सेवा बजावत असलेल्या बोरवडे (ता. कागल) येथील कुमार रघुनाथ कांबळे यांची सुभेदारपदी पदोन्नती झाली. यानिमित्त बोरवडे ग्रामस्थांच्या वतीने त्यांची गावातून मिरवणूक काढून स्वागत करण्यात आले. पारंपरिक वाद्यांच्या गजरात सजविलेल्या गाडीतून बिद्री साखर कारखाना ते बोरवडे गावापर्यंत मिरवणूक काढण्यात आली. सुभेदार कांबळे म्हणाले, ‘प्रतिकूल परिस्थितीवर मात करत मोठ्या परिश्रमाने या पदापर्यंत पोहोचलो. शालेय विद्यार्थ्यांनीही यश मिळेपर्यंत प्रयत्नांची पराकाष्ठा करावी. सैन्यदलात देशसेवा बजावताना मिळालेले सुभेदारपद माझ्या गावासाठी भूषणावह असून, गावातील अन्य तरुणांनीही सैन्यात भरती होऊन देशसेवा करावी.’ यावेळी बोरवडे ग्रामपंचायतीच्या वतीने उपसरपंच विनोद वारके, संभाजी फराकटे, ग्रामसेवक सागर पार्टे यांच्या हस्ते सुभेदार कांबळे यांचा सत्कार करण्यात आला. भारतमाता हायस्कूलमध्ये मुख्याध्यापक एस. पी. पाटील, बोरवडे विद्यालय बोरवडे येथे इ. डी. घोरपडे आणि प्राथमिक शाळा बोरवडे येथे मुख्याध्यापक जयसिंग पाटील यांच्या हस्ते त्यांचा सत्कार झाला. यावेळी कांबळे यांचे दहावीतील वर्गमित्र, शिक्षक, विद्यार्थी व ग्रामस्थ उपस्थित होते.