विठुनामाच्या गजरात दिंड्या रवाना

4648
बेले (ता. करवीर) ः येथील सद्‍गुरू सेवा भजनी मंडळाची आषाढी एकादशीला विठ्ठलाच्या दर्शनाला निघालेली वारकऱ्यांची पायी दिंडी. (राजू कुलकर्णी ः सकाळ छायाचित्रसेवा)
..............
विठुनामाच्या गजरात दिंड्या रवाना

राधानगरी, करवीर तालुक्यांत पायी दिंड्यांची परंपरा

सकाळ छायाचित्रसेवा
शिरगाव, ता. २४ ः विठुनामाचा आणि टाळमृदंगाचा गजर तसेच खांद्यावर भगव्या पताका फडकवत भावभक्तीच्या वातावरणात करवीर, राधानगरी तालुक्यांतील वारकऱ्यांच्या पायी दिंड्या पंढरपूरला आषाढी एकादशीला रवाना झाल्या. विठ्ठलाच्या दर्शनाची आस लागून राहिलेल्या वारकऱ्यांची पावले आषाढी एकादशीपर्यंत पंढरीच्या दिशेने चालत राहणार आहेत.
आषाढ महिन्यातील शुद्ध एकादशीला देवशयनी एकादशी म्हणतात. महाराष्ट्राच्या सांस्कृतिक आणि आध्यात्मिक परंपरेची पताका हाती घेऊन वारकरी चालू लागले आहेत. सर्व मानवजातीमध्ये या एकादशीला महत्त्व आहे. म्हणूनच आषाढी एकादशीला लाखो वारकऱ्यांची गर्दी होते. राधानगरी, करवीर तालुक्यातून अनेक गावांतील वारकरी पायी दिंडीने प्रस्थान करत आहेत.
बेले (ता. करवीर) येथील सद्‍गुरू सेवा भजनी मंडळाची दिंडी मंगळवारी गावातून निघाली. दिंडीला निरोप देण्यासाठी अख्खे गाव सहभागी झाले होते. टाळ-मृदूंगाच्या गजराबरोबर मधूनमधून येणाऱ्या पावसाच्या सरींमुळे दिंडीतील वारकरी भक्तिरसाबरोबर पावसाच चिंब न्हाऊन गेले होते. आकर्षक फुलांनी सजविलेल्या बैलांच्या रथामध्ये विठ्ठल-रखुमाईची मूर्ती प्रतिष्ठापित केल होती. रथाच्या पुढे विणेधारी, तुळशी वृंदावन डोक्यावर घेतलेल्या महिला व वारकरी सहभागी होते. बेले, कुरुकली, हळदी, कोल्हापूरमार्गे दिंडी दशमीच्या दिवशी पंढरपुरात दाखल होणार आहे.
.........
चौकट...
पावसातही हरिनामाचा गजर
सध्या पावसाने दमदार हजेरी लावली आहे. तरीही कुणी छत्री, रेनकोट, प्लास्टिक कागद अंगावर घेऊन विठुनामाच्या सोहळ्यात सहभागी झाले आहेत. कितीही पाऊस आला तरी पावसात चिंब न्हाऊन वारकरी राम-कृष्ण-हरीचा गजर करत आहेत.