पाऊस

ढगांच्या गडगटासह
शहरात मुसळधार पाऊस
सकाळ वृत्तसेवा
कोल्हापूर, ता. ३० ः शहरासह जिल्ह्यातील काही भागांना आज मुसळधार पावसाने झोडपून काढले. विजांचा लखलखाट आणि ढगांच्या गडगडाने शहर व्यापून गेले होते. सायंकाळी सातच्या दरम्यान सुरू झालेला पाऊस रात्रीपर्यंत थांबून थांबून कोसळत होता. दिवसभराच्या प्रचंड उकाड्यानंतर झालेल्या पावसाने रात्री हवेत कमालीचा गारवा निर्माण झाला होता. दरम्यान, नानीबाई चिखलीत एका घरावर वीज कोसळली; मात्र सुदैवाने कोणासही इजा झाली नाही.
जयसिंगपूरमध्ये वीज खंडित
जयसिंगपूर : शहर व परिसराला सोमवारी रात्री मुसळधार पावसाने झोडपून काढले. रात्री साडेनऊच्या सुमारास ढगांच्या कडकडाटांसह पावसाने हजेरी लावली. विश्रांती घेतलेल्या पावसाने पुन्हा दमदार हजेरी लावली आहे. शेतात आता कुठे मशागतीचे दिवस येत असताना झोडपून काढलेल्या पावसाने शेतकऱ्यांना आणखी किमान पंधरा दिवस प्रतीक्षा करावी लागणार आहे. ढगांच्या गडगडात सुरू झालेल्या पावसाने वीज पुरवठाही खंडित करण्यात आला होता.
(आणखी वृत्त पान ३ वर)