कोल्हापूर गारगोटी राज्य महामार्ग विद्रूपीकरण

85440
कचऱ्याच्या ढिगामुळे
राज्यमार्गाचे विद्रुपीकरण

कोल्हापूर-गारगोटी मार्ग; उठावाची मागणी

कळंबा, ता. २२ ः कोल्हापूर-गारगोटी राज्य महामार्गाच्या दुतर्फा अनेक नागरिकांनी मोठ्या प्रमाणात कचरा टाकला आहे. वाऱ्याने कचरा सर्वत्र पसरत असल्याने नव्याने बांधण्यात आलेल्या राज्यमार्गाचे विद्रूपीकरण होत आहे. दोन दिवसांपूर्वी पडलेल्या वळीव पावसामुळे कचरा कुजला असून डास, माशा, दुर्गंधीचा प्रादुर्भाव वाढला आहे.
महाराष्ट्र, कर्नाटकसह परराज्याला जोडणाऱ्या कोल्हापूर-गारगोटी राज्य महामार्गाची नव्याने बांधणी सुरू आहे. रस्त्याचे ९० टक्के काम पूर्ण झाले असून उर्वरित कामासाठी युद्धपातळीवर कार्यवाही सुरू आहे. रस्त्याची रुंदी वाढली असून अनेक नाल्यांवर पूल बांधले आहेत. मात्र रस्त्याच्या दुतर्फा नागरिकाकडून घरातील दैनंदिन घनजैविकचरा, शीतपेये, मद्य व पाण्याच्या रिकाम्या बाटल्या, रुग्णांचे कपडे, जीर्ण अंथरूण असा कचरा टाकला जात आहे. हॉटेल व्यवसायामधील शिळे अन्न, नाशवंत खाद्यपदार्थ, चिकन मटण दुकानातील मांसयुक्त कचरा, पिसे उघड्यावरच व्यावसायिक टाकत आहेत. त्यामुळे भटकी जनावरे व कुत्र्यांच्या झुंडींचा वावर वाढला आहे. अनेक कुत्री फिरायला येणाऱ्या नागरिक, शेतकऱ्यांवर चाल करून जात आहेत. महामार्गाच्या दोन्ही बाजूंना कळंबा तलावाचे पाणलोट क्षेत्र आहे. कोल्हापूर इचलकरंजी प्रादेशिक उद्यानांतर्गत परिसरात तलावाला बाधा पोहोचवणारे उद्योग, हॉटेल व्यवसाय, नागरी वस्ती यांना मनाई आहे. मात्र येथील अनेक शेतीचे क्षेत्र पिवळ्या पट्ट्यामध्ये म्हणजेच नागरी विकासासाठी आरक्षित केले आहे. नागरी वस्ती व उद्योग व्यवसायाचे प्रमाण वाढत असून व्यावसायिक व नागरिक राज्य मार्गाच्या दुतर्फा व मोकळ्या जागेत कचरा आणून टाकलेला आहे.

कोट
कोल्हापूर-गारगोटी राज्य महामार्गाशेजारी व कळंबा तलाव परिसरात कचरा आणून टाकणाऱ्या व्यावसायिक व नागरिकांवर ग्रामपंचायतच्या वतीने कायदेशीर कारवाई करण्यात येईल.
- सुमन गुरव, सरपंच