शेतकरी दाम्पत्याच्या मुलीचे ‘नीट’मध्ये पहिल्याच प्रयत्नात यश

5728
ऋतिका पाटील
......
शेतकरी दाम्पत्याच्या मुलीचे
‘नीट’मध्ये पहिल्याच प्रयत्नात यश

कोनवडे, ता. ६ : घरची परिस्थिती बेताची. आई-वडील शेतकरी. अनंत अडचणी असतानाही प्रतिकूल परिस्थितीवर मात करत कुटुंबाचा गाडा हाकणाऱ्या नाधवडे (ता. भुदरगड) येथील शेतमजूर कुटुंबातील ऋतिका रघुनाथ पाटील हिने पहिल्याच प्रयत्नात ‘नीट’ परीक्षेत ६२३ गुण मिळवत यश संपादन केले.
ऋतिकाचे प्राथमिक व माध्यमिक शिक्षण नाधवडेत, तर अकरावी-बारावीचे शिक्षण मुदाळ येथील प. बा. पाटील सायन्स ॲकॅडमीमध्ये झाले. डॉक्टर होण्याचे स्वप्न उराशी बाळगून ती अविरत कष्ट घेत होती. सोमवारी (ता. ४) ‘नीट’चा निकाल जाहीर झाला. त्यात तिने पहिल्याच प्रयत्नात ६२३ गुण मिळवले. ऋतिकाचे वडील रघुनाथ पाटील व आई सविता पाटील अल्पशिक्षित आहेत. वडील मुंबईत हॉटेलमध्ये काम करत होते. मात्र, तेथील तुटपुंज्या पगारात कुटुंबाचा खर्च भागणे अवघड बनल्याने त्यांनी गावी येऊन शेती तसेच ऊसतोडणीचे काम सुरू केले. मुलीच्या यशामुळे पाटील कुटुंबीयांच्या आनंदाला पारावार उरला नाही. गरीब शेतकरी कुटुंबातील ऋतिकाने नीट परीक्षेत यश मिळवले; पण पुढच्या शिक्षणासाठी खर्च करणे जिकिरीचे असल्याने तिला गरज आहे ती समाजाच्या आर्थिक पाठबळाची.
.............