उत्तूरला मिरवणुकीने शिवराज्याभिषेक सोहळा

उत्तूरला मिरवणुकीने
शिवराज्याभिषेक सोहळा
उत्तूर, ता. ६ : ग्रामपंचायत उत्तूर व ग्रामस्थांतर्फे छत्रपती शिवाजी महाराजांच्या राज्याभिषेक सोहळ्यानिमित्त मिरवणुक काढली. ढोल ताशा आणि पारंपरिक वाद्यांच्या गजरात व विविध घोषणा देत कलश मिरवणूकही काढली.
सकाळी छत्रपती शिवाजी महाराज चौकातून मिरवणूकीला सुरुवात झाली. पारंपरिक वाद्ये वाजवीत विठ्ठल रुक्मिणी सांप्रदायिक भजनी मंडळ, उत्तूर विद्यालयाचे झांझ पथक, पेद्रेवाडी येथील जिजाऊ महिला लेझीम पथक मिरवणूकीत सहभागी झाले होते. ग्रामपंचायत आवारातील शिव पुतळ्यास सरपंच किरण आमणगी व मयुरी आमणगी यांच्याहस्ते अभिषेक घातला. नागरिकांना ग्रामपंचायतीतर्फे मोफत रोपे दिली. या रोपांचे आजपासून ६ जून २०२४ अखेर योग्य संगोपन करणाऱ्या दहा नागरिकांना सिद्धिविनायक फाउंडेशनतर्फे पारितोषिक देणार असल्याचे सदस्य मंदार हाळवणकर यांनी जाहीर केले.
उपसरपंच समीक्षा देसाई, जिल्हा परिषद माजी सदस्य उमेश आपटे, माजी सभापती वसंतराव धुरे, पंचायत समिती माजी सदस्य शिरीष देसाई, मारुती घोरपडे, धोंडीराम सावंत, श्रीपती यादव, स्वागत परुळेकर, प्रवीण लोकरे आदी उपस्थित होते.