भुजबळ धमकी जोड

प्रशांत मूळचा
चंदगड तालुक्यातील
कोल्हापूर, ता. ११ : मंत्री छगन भुजबळ यांना धमकावणारा संशयित प्रशांत दशरथ पाटील चंदगड तालुक्यातील कडलगे खुर्द येथील आहे. गावात शांत, संयमी वागणाऱ्या प्रशांतने अशाप्रकारचे कृत्य कसे केले, याबाबत उलटसुलट चर्चेला उधाण आले. दहावीपर्यंत शिक्षण झाल्यानंतर प्रशांतने खासगी इन्स्टिट्यूटमधून इलेक्ट्रिशनचा अभ्यासक्रम पूर्ण केल्याचे सांगितले जाते. त्याने काही काळ गावाजवळ ढोलगरवाडी येथे एका दुकानात संगणक ऑपरेटर म्हणून काम केले. तो सहा वर्षांपूर्वी पुणे येथे नोकरीसाठी गेला; मात्र त्याला महाड येथून अटक केल्याचे वृत्त आल्यानंतर पुण्यातून तो महाड येथे कशासाठी गेला, याबाबतही ग्रामस्थांत चर्चा होती. गतवर्षी दिवाळीत तो गावाकडे आला होता. त्याचे वडील शेतकरी असून, आईचे यापूर्वी निधन झाले आहे. वडील व आजी गावाकडे राहतात. प्रशांतच्या या वागण्यामुळे वडील दशरथ यांना मोठा धक्का बसला आहे.