संशोधकांना मिळणार जनगणनेतील मूलभूत माहिती

42942
...
संशोधकांना मिळणार
जनगणनेतील मूलभूत माहिती

डॉ. निरूपमा डांगेः शिवाजी विद्यापीठातील कार्यकेंद्राचे उदघाटन

सकाळ वृत्तसेवा
कोल्हापूर, ता. ३ : ‘शिवाजी विद्यापीठातील जनगणना माहिती कार्यकेंद्रामध्ये दर्जेदार संशोधन व्हावे. त्या माध्यमातून प्रशासनाला धोरणे निश्चित करण्यासाठी योग्य दिशादर्शन व्हावे’, अशी अपेक्षा जनगणना कार्य संचालनालयाच्या (महाराष्ट्र) संचालक डॉ. निरुपमा डांगे यांनी आज येथे व्यक्त केली.
विद्यापीठाच्या संख्याशास्त्र अधिविभागात संचालनालयाच्या जनगणना माहिती संशोधन कार्यकेंद्राची स्थापना केली आहे. या अनुषंगाने विद्यापीठासमवेत सामंजस्य करार आणि कार्यकेंद्राचे औपचारिक उद्घाटन अशा संयुक्त कार्यक्रमात त्या बोलत होत्या. अध्यक्षस्थानी कुलगुरू डॉ. दिगंबर शिर्के, तर प्र-कुलगुरू डॉ. प्रमोद पाटील प्रमुख उपस्थित होते.
डॉ. डांगे म्हणाल्या, ‘जनगणनेद्वारे प्राप्त होणारी माहिती ही अत्यंत मूलभूत असते. तिची गोपनीयता ही सर्वोच्च प्राधान्याची बाब असली तरी संशोधकांना ही माहिती उपलब्ध करून देऊन देशाला दिशादर्शक अशी धोरणे आखण्यासाठी तिचा अतिशय उत्तम वापर करता येऊ शकतो.’
कुलगुरू डॉ. शिर्के म्हणाले, ‘सामंजस्य करार दूरगामी उपयुक्त स्वरुपाचा ठरेल. जनगणना कार्य संचालनालयासमवेत झालेल्या या सामंजस्य करारामुळे जनगणनेसारख्या अत्यंत मूलभूत माहितीच्या विश्लेषणावर संशोधकांना काम करता येणे शक्य होणार आहे. संचालनालयानेही काही संशोधनात्मक प्रश्न सुचवावेत, म्हणजे त्यांनाही आवश्यक ते विश्लेषण येथूनच करून देता येईल.’
यावेळी संचालनालयाविषयी वरिष्ठ अधिकारी ए.एन. राजीव यांनी सादरीकरण केले. सामंजस्य करारावर संचालनालयातर्फे डॉ. डांगे यांनी, तर विद्यापीठातर्फे कुलसचिव डॉ. विलास शिंदे यांनी स्वाक्षरी केल्या. यावेळी व्ही.ए. अहिरे, वाय. एस. पाटील, किरण गुरव, प्रवीण भगत, डॉ. श्रीकृष्ण महाजन, महादेव देशमुख, सरिता ठकार, प्रकाश पवार, अभिजीत रेडेकर उपस्थित होते. डॉ. शशीभूषण महाडिक यांनी स्वागत केले. डॉ. सोमनाथ पवार यांनी आभार मानले.
...
संशोधन कार्यकेंद्र असे ...
‘विद्यापीठातील या संशोधन केंद्रातील सुविधांचा लाभ विद्यापीठासह बाहेरील संशोधकांना घेता येणार आहे. माहिती घेण्यासाठी, विश्लेषण करण्यासाठी संगणक, प्रिंटर आणि सांख्यिकीय विश्लेषणासाठी आवश्यक असलेले सॉफ्टवेअरही उपलब्ध आहेत’, अशी माहिती संख्याशास्त्र अधिविभाग प्रमुख डॉ. महाडिक यांनी दिली.