-

भरधाव मोटार आली अन चिखलात रूतली
खांडसरीनजीक अपघात ः सुदैवाने खड्डयात कोसळताना वाचली

शिंगणापूर, ता.६ : रस्ता अरूंद, वेळ रात्री पावणेनऊची, शिंगणापूर रोडवरून भरधाव वेगाने मोटार आली ती थेट खांडसरी नाक्याजवळील गळती काढण्यासाठी काढलेल्या भल्या मोठ्या खड्ड्याशेजारील चिखलात रूतली. सुदैवाने, पुढील अनर्थ टळला. खड्ड्यात कोसळली असती तर मोठा अपघात घडला असता. त्या अलिशान मोटारीत असलेल्या चौघाही तरूणांना भान नसल्याने हा अपघात घडला. अपघाताची माहीती मिळताच मोटारचालकाच्या संबधितांनी घटनास्थळी धाव घेतली व नागरिकांच्या मदतीने मोटार रात्री उशीरा बाहेर काढली.
घटनास्थळावरून मिळालेली माहिती अशी, शिंगणापूर रोडवरून कोल्हापूरच्या दिशेने भरधाव वेगाने एक अलिशान मोटार भरधाव वेगाने आली. या मोटारीचा वेग व त्या मार्गावरील वाहतुकीच्या गर्दीमुळे अनेकांच्या काळजाचा ठेका चुकला. या मोटारीतील तरुणांना स्वतःचे भान नव्हेतच. या मोटारीच्या वेगामुळे कोणतीही दुर्घटना होऊ नये म्हणून अनेकांना आपली वाहने स्वतःच रस्त्याकडेला थांबवल्या.
याच दरम्यान, शिंगणापूर फाट्यावर खांडसरीनजीक शहर पाणी योजनेच्या कामासाठी रस्त्यात भला मोठा खड्डा खणला आहे. गेले पंधरा दिवस येथे दुरूस्तीचे काम सुरू आहे. भरधाव वेगाने आलेली मोटार व समोर खड्डा दिसताच चालकाचे नियंत्रण सुटले, ती खड्ड्याशेजारील चिखलात अडकली अन् पुढील अनर्थ टळला.