मारहाणीतील जखमी तरूणाचा मृत्यू

मारहाणीतील जखमी तरुणाचा मृत्यू
मृतदेह ताब्यात घेण्यास नकार; सीपीआरमध्ये तणाव

सकाळ वृत्तसेवा
कोल्हापूर, ता. २५ : आपटेनगरमधील अपघातानंतर झालेल्या मारहाणीत गंभीर जखमी झालेला विवेक बाळासाहेव शिंदे (वय २७, रा. माजगावकरनगर) यांचा उपचारादरम्यान मृत्यू झाला. यानंतर संतप्त नातेवाइकांनी मारहाण करणाऱ्या संशयितांवर खुनाचा गुन्हा दाखल करून अटकेची मागणी केली. कारवाईस विलंब होऊ लागल्याने नातेवाइकांनी मृतदेह ताब्यात घेण्यास नकार दिला. त्यावरून बुधवारी रात्री सीपीआर परिसरात तणावाचे वातावरण निर्माण झाले होते.
विवेक शिंदे हा १२ एप्रिलला सायंकाळी चारचाकी वाहनातून आपटेनगर परिसरात गेला होता. यावेळी जेसीबी मशीन आणि त्यांच्या मोटारीचा किरकोळ अपघात झाला होता. यावेळी जेसीबी मालकांसह तिघांनी विवेक शिंदेला बेदम मारहाण केली. जखमी विवेकवर खासगी रुग्णालयात प्रथमोपचार करण्यात आले. प्रकृती अत्यावस्थ बनल्याने त्याला सीपीआरमध्ये उपचारासाठी आणण्यात आले. उपचारादरम्यान २४ एप्रिलला विवेकचा मृत्यू झाला. दरम्यान, संतप्त झालेल्या नातेवाइकांनी मृतदेह ताब्यात घेण्यास नकार दिला. पोलिस निरीक्षक संजीव झाडे यांनी नातेवाइकांची समजूत काढली. गुन्हा दाखल करण्याचे आश्वासन दिल्यानंतर रात्री अकरा वाजता मृतदेह ताब्यात घेतला.