Paid Holiday on Voting: मतदानासाठी ७ मे रोजी पगारी सुट्टी द्या अन्यथा कारवाई करणार ! सहायक कामगार आयुक्तांचे आवाहन

सकाळ वृत्तसेवा

इचलकरंजी, ता. २६ : लोकसभा निवडणुकीमध्ये मतदानासाठी सर्व आस्थापना व कारखान्यांतील कामगारांना ७ मे रोजी सुटी जाहीर केली आहे. त्याची अंमलबजावणी सर्व आस्थापना, कारखाने, दुकानदारांनी करावी, असे आवाहन सहायक कामगार आयुक्त जानकी भोईटे यांनी केले आहे.

हातकणंगले मतदारसंघांत ७ मे रोजी मतदान होणार आहे. यावेळी नागरिकांना मतदानाचा हक्क बजावता यावा, यासाठी एमआयडीसी, पॉवरलूम, प्रोसेसिंग, पेट्रोल पंप, मेडिकल, बांधकाम, हॉटेल, उद्योग, ऊर्जा व कामगार विभागात येणाऱ्या आस्थापना, कारखाने, दुकाने आदी क्षेत्रांतील कामगारांना पगारी सुटी जाहीर केली आहे. सहायक कामगार आयुक्त कार्यालयाच्या कार्यकक्षेत शिरोळ व हातकणंगले या दोन तालुक्यांचा समावेश आहे. तसेच शहर व आसपासच्या परिसरात उद्योग, ऊर्जा व कामगार विभागातंर्गत येणाऱ्या सर्व आस्थापना, कारखाने, दुकाने यांचे प्रमाण अधिक आहे. परिणामी येथे कामगारांची संख्या लक्षणीय आहे.
आस्थापनांनी लोकसभा निवडणुकीदिवशी मतदानाचा हक्क बजावण्यासाठी भरपगारी सुटी द्यावी.

सुटी ही साप्ताहिक सुटी रद्द करून देऊ नये. याबाबत ज्या आस्थापना कर्मचाऱ्‍यांना सुटी अथवा सवलत देत नसल्याच्या तक्रारी प्राप्त झाल्यास त्यांच्याविरुद्ध कारवाई करण्यात येईल, असा इशारा दिला आहे.

पूर्ण दिवस शक्य नसल्यास तीन तासांची सवलत

अपवादात्मक परिस्थितीत कर्मचाऱ्‍यांना पूर्ण दिवस सुटी देणे शक्य नसेल त्यांना दोन ते तीन तासांची सवलत द्यावी. त्याबाबत आस्थापनांना आयुक्त, महानगरपालिका अथवा जिल्हाधिकारी यांची पूर्व परवानगी घेणे आवश्यक आहे. कोणत्याही परिस्थितीत मतदानासाठी किमान दोन ते तीन तासांची सवलत मिळेल याची दक्षता संबंधित आस्थापना मालकाने घेणे आवश्यक राहील, असे पत्रकात नमूद केले आहे.