पंचगंगेतून इचलकरंजीस दिवसभर पाणी उपसा बंद

पंचगंगेतून इचलकरंजीस
दिवसभर पाणी उपसा बंद
इचलकरंजी ः पंचगंगा नदीतून इचलकरंजी शहरास करण्यात येणारा पाणीपुरवठा बंद राहिला. उपसा केंद्रामधील रोहित्रामध्ये तांत्रिक बिघाड झाला होता. त्यामुळे सकाळपासूनच पाणी उपसा बंद राहिला. दिवसभरात युध्द पातळीवर मोहिम राबवून तांत्रिक बिघाड दूर केला. त्यांनतर सांयकाळी पुन्हा पाणी उपसा सुरू झाला. त्यामुळे इचलकरंजीकरांना दिलासा मिळाला आहे. प्रदुषणामुळे गेले काही दिवस खबरदारी म्हणून महापालिकेने पंचगंगा नदीतील उपसा बंद केला होता. मात्र नदी प्रवाहित झाल्यानंतर पाणी उपसा पूर्ववत होत असतानाच आज दिवसभर त्यामध्ये खंड पडला. त्यामुळे साधारणपणे नऊ एमएलडी इतकी पाण्याची तूट निर्माण झाली. दरम्यान, आयुक्त ओमप्रकाश दिवटे यांच्या आदेशानुसार कार्यकारी अभियंता सुभाष देशपांडे यांनी रोहित्र दुरुस्तीची यंत्रणा कार्यान्वित केली.