इचल : घंटागाडी कर्मचारी आंदोलन

घंटागाडीवरील कंत्राटींचे
इचलकरंजीत सोमवारपासून उपोषण
प्राचार्य पाटील : बुधवारपासून कामबंद आंदोलन

इचलकरंजी, ता. १९ ः इचलकरंजी महापालिकेच्या घंटागाडीवरील कंत्राटी कामगार सोमवारपासून (ता. २३) आमरण उपोषणाला सुरुवात करणार आहेत.
दोन दिवसांत मार्ग न निघाल्यास २५ जूनपासून काम बंद आंदोलन करीत आयुक्तांना घेराओ घालणार आहेत, अशी माहिती महापालिका कर्मचारी समन्वय समितीचे अध्यक्ष प्राचार्य ए. बी. पाटील यांनी दिली.
प्राचार्य पाटील म्हणाले, ‘इचलकरंजी महापालिकेकडे ५२ घंटागाड्यावर १७२ कर्मचारी काम करतात. किमान १२५ कर्मचारी दैनंदिन कामकाजात सहभागी होत असतात. या कामगारांना किमान वेतनाप्रमाणे पगार मिळत नाही. अंदाजपत्रकातील तरतुदीनुसार जिल्हा दर सूचीप्रमाणे पगार दिला जातो. मात्र पगार देताना ठेकेदार कंपनीकडून फसवणूक केली जात आहे. ४ दिवसांच्या सुट्या वगळून पगार देणे आवश्यक आहे. पण त्याप्रमाणे दिला जात नाही. सध्या तर तासावर पगार दिला जात आहे. फंड व विमा योजनेचा हप्ता कंपनीकडून न घेता कामगारांच्या वेतनातून कपात केला जात आहे. वेतन चिठ्ठी दिली जात नाही. सहा महिन्यांला महागाई भत्ता वाढला जातो. त्यानुसार कामगारांना वार्षिक वेतनवाढ दिली जात नाही. चालकाला १३,५०० व मदतनीसला १३,००० रुपये पगार मिळाला पाहिजे. प्रत्यक्षात मात्र कामगारांना ४ ते ६ हजारांपर्यंतच पगार जमा केला जात आहे. कामगारांचे वेतन महापालिकेकडून थेट बँक खात्यावर जमा करावे, अशी मागणी आहे.
या सर्व मागण्यांसाठी आंदोलन करण्याचा निर्णय घेतला आहे. सोमवार (ता. २३) पासून दहा कर्मचारी महापालिकेसमोर आमरण उपोषणाला बसणार आहेत. मंगळवारी (ता. २४) दुपारी ४ वाजता जिल्ह्यातील विविध स्थानिक स्वराज्य संस्थामधील कंत्राटी कामगार जिल्हाधिकारी कार्यालयासमोर निदर्शने करणार आहेत. यावेळी या प्रश्नावर जिल्हाधिकारी यांच्याकडे हस्तक्षेप करण्याची मागणी केली जाणार आहे. त्यानंतरही तोडगा न निघाल्यास २५ जूनपासून बेमुदत काम बंद आंदोलन करण्यात येणार आहे. पत्रकार परिषदेस सचिन साठे, सचिन आवळे, शक्ती गागडे, विजय कांबळे, दयानंद कांबळे, प्रकाश डावरे, प्रशांत तिवडे, विठ्ठू कांबळे, रवीराज कांबळे, महेश धुमाळ, संजय जावळे, सुनील माने, महादेव कांबळे, मनीष लाखे, अविनाश भिसे आदी उपस्‍थित होते.