कचरा उठाव : आमदार सतेज पाटील

ग्रामीण, शहरातील कचऱ्याचे
तातडीने व्यवस्थापन करा
आमदार सतेज पाटील यांचे जिल्हा परिषद, महापालिकेला निवेदन
सकाळ वृत्तसेवा
कोल्हापूर, ता. २४ : जिल्ह्यातील ग्रामीण आणि शहरी भागांत कचऱ्याची समस्या वाढली आहे. यावर जिल्हा परिषद आणि महापालिकेने तत्काळ उपाययोजना करून कचरा स्वच्छ करावा, अशी मागणी आमदार सतेज पाटील यांनी जिल्हा परिषदेचे मुख्य कार्यकारी अधिकारी आणि आयुक्तांकडे निवेदनाद्वारे केली आहे.
निवेदनात म्हटले आहे, जिल्ह्यातील ग्रामीण भागातील कचऱ्याची समस्या दिवसेंदिवस वाढत आहे. जिल्ह्यातील ठरावीक ग्रामपंचायती कचरा संकलित करतात; परंतु बहुतांश ग्रामपंचायतींना कचरा संकलनासाठी सुविधा नाही. कचरा रस्त्यावरच अस्ताव्यस्त दिसतो. अनेक ठिकाणी कचरा साचून दुर्गंधी व अस्वच्छतेचे वातावरण आहे. याचा थेट परिणाम नागरिकांच्या आरोग्यावर होत असून, डेंगी, मलेरियांसारख्या रोगांचा धोका वाढत आहे. या समस्येचे गांभीर्य लक्षात घेऊन तातडीने उपाययोजना करणे आवश्यक आहे. गावामध्ये ठिकठिकाणी कचरापेट्या बसवाव्यात आणि नियमितपणे कचरा उचलण्याची व्यवस्था करावी. नागरिकांत कचरा व्यवस्थापनाविषयी जनजागृती करावी. ग्रामपंचायतीमार्फत प्रत्येक घरात ओला व सुका कचरा वेगळा गोळा केला जावा. ओला कचऱ्यापासून सेंद्रिय खत तयार करण्यासाठी गावपातळीवर कंपोस्टिंग टाक्या उभाराव्यात. प्लास्टिक बंदीची प्रभावी अंमलबजावणी करावी. काच, प्लास्टिक, धातूच्या कचऱ्याचा पुनर्वापर आणि पुनर्निर्मितीबाबत नागरिकांना माहिती द्यावी. जिल्ह्यातील ग्रामीण भागामधील वाढत्या कचरा समस्येचा गांभीर्याने विचार करून वरील उपाययोजना करण्यासाठी योग्य ती कारवाई करावी.