सरवडे घरफाळा माफ

पहिल्या इयत्तेतील प्रवेशित
पाल्याचा घरफाळा माफ

कपिलेश्वर ग्रामपंचायतीचा निर्णय

सकाळ वृत्तसेवा
सरवडे, ता. २० : ‘जिल्हा परिषदेच्या शाळा टिकणे काळाची गरज ओळखून पालकांनी आपल्या पाल्यांना गावातीलच मराठी शाळेत प्रवेश घेतला पाहिजे. यासाठी गावातील प्रत्येक नागरिकाने पुढाकार घेतला पाहिजे,’ असे प्रतिपादन कपिलेश्वर (ता. राधानगरी) येथील सरपंच शहाजी पाटील यांनी केले.
सरपंच शहाजी पाटील यांनी पालक व विद्यार्थ्यांना प्रोत्साहन देण्यासाठी पहिलीच्या वर्गात प्रवेश घेणाऱ्या विद्यार्थ्यांच्या पालकाचा नावे असणाऱ्या निवासी मिळकतीचा घरफाळा २०२५-२६ साठी माफ करणार असल्याचे जाहीर केले. उपसरपंच सुशांत आळवणे यांनी पहिलीच्या सर्व नव्याने प्रवेशित मुलांना शालेय स्टेशनरी किट वाटप केले. तसेच शाळा व्यवस्थापन समिती आणि सर्व शिक्षकांमार्फत विद्यार्थ्यांना स्वच्छतेच्या सवयी लागण्यासाठी प्रोत्साहन म्हणून टूथब्रशचेही वाटप केले.
यावेळी केंद्रप्रमुख दिलीप पाटील, शाळा समिती समिती अध्यक्ष दीपक मनुगडे, कृष्णात मनुगडे, महादेव कुंभार, कृष्णात बाबर, राजेंद्र कवडे, यशोदा म्हाळुंगेकर, माधुरी पाटील, पांडुरंग पाटील, गीता जाधव, प्रिया गिरी, शुभांगी पाटील, महादेव कुंभार आदींसह मान्यवर पदाधिकारी, पालक, ग्रामस्थ, विद्यार्थी उपस्थित होते. सुनील पाटील यांनी स्वागत केले. महादेव कुंभार यांनी प्रास्ताविक केले. शिवाजी बारड यांनी सूत्रसंचालन केले. गीता जाधव यांनी आभार मानले.