ते चक्क इचलकरंजीतून उत्तरप्रदेशाकडे सायकलवर निघाले अन् मध्येच...

इचलकरंजी - खाण्यापिण्यास काही नाही, थोडेफार असलेल्या पैशावर इतके दिवस काढले, घरभाडे देण्याची परिस्थीती नाही, आता आम्हाला आमच्या गावी जाण्याशिवाय पर्याय नाही, अशी हतबलता व्यक्त करीत येथील 19 परप्रांतीय कामगार सायकलवरुन उत्तरप्रदेशमधील आपल्या मुळगावी सायकलवरुन निघाले. मध्यरात्रीच्या वेळेस शहरात सुन्नाटा  असतांना एकत्रीत सर्वजण मिरजेच्या दिशेने जात होते. पण महासत्ता चौकात असलेल्या तपासणी नाक्यावरील तैनात पालिका कर्मचार्‍यांच्या नजरेस हे सर्वजण पडले. या कामगारांना त्यांनी पुढे जाण्यास मनाई केली. त्यांना पोलीसांच्या मदतीने आयजीएम रुग्णालयात पाठविण्यात आले. पुढील कार्यवाही म्हणून त्यांना रुग्णालय प्रशासनाकडून होम क्वारंटाईन करण्यात आले.

गाव गाठण्याचा धाडसी निर्णय

शहरात अ‍ॅटोलूम कारखाने मोठ्या प्रमाणात आहेत. या कारखान्यांमध्ये बहुतांशी परप्रांतीय कामगार आहेत. लॉक डाऊन झाल्यामुळे सर्व अ‍ॅटोलून कारखाने बंद आहेत. त्यामुळे या कामगारांना घरीच राहणे भाग पडले. यातील कांही मालकांनी आपापल्या परीने कामगारांना मदत केली. पण कांही मालकांनी मदतीकडे दुर्लक्ष केले. शिल्लक असलेल्या पैशातून गेली महिनाभर त्यांनी कशी तरी गुजरान केली. घरभाडे देण्याची पण कुवत राहिली नाही. खाण्यापिण्याचे हाल होवू लागले.  अशा अनेक परप्रांतीय कामगारांना आपल्या मूळ गावी जाण्याचे वेध लागले. पण जाण्यासाठी वाहनांची सुविधा नाही. विविध कारखान्यात काम करणारे पण उत्तरप्रदेशमधील एकाच गावात राहणारे 19 कामगार एकत्र आले. लिंबू चौक, संत मळा, संग्राम चौक, बाळनगर, शहापूर आदी परिसरातील हे कामगार आहेत. त्यांनी चक्क सायकलवरुन उत्तरप्रदेशमधील चंदोली जिल्ह्यातील मुरलीधर धानापूर हे आपले गाव गाठण्याचा धाडसी निर्णय घेतला.

वाचा - ती म्हणते, आधीच कोरोना मुळे संसाराची वाट लागलीय अन् त्यांना दारू कोठून मिळाली ?

मिरजमार्गे रेल्वे ट्रॅकवरुन आपल्या गावी जाण्याचे या कामगारांनी निश्‍चीत केले. सर्व 19 कामगार मंगळवारी मध्यरात्री एकत्र आले. त्यानंतर सर्वजण सायकलवरुन शहरातून निघाले. मिरजकडे जाण्यासाठी महासत्ता चौक मार्गे जात असतांना तेथे असलेल्या तपासणी नाक्याजवळील पालिका कर्मचार्‍यांच्या नजरेस सर्वजण पडले. या सर्वांना पुढे जाण्यास रोखण्यात आले. सोशल डिस्टन्सींग राखून त्यांना तेथेच थांबविण्यात आले. याबाबतची माहिती पोलीस व प्रशासनाला देण्यात आली. यावेळी कामगारांनी आपली हतबलता प्रशासनासमोर व्यक्त केली. पण लॉक डाऊनमुळे परप्रांतीय कामगारांना सोडण्यात येत नसल्यामुळे त्यांना आयजीएम रुग्णालयात नेण्यात आले. तेथे त्यांची तपासणी करण्यात आली. खबरदारी म्हणून त्यांना शिक्के मारुन होम क्वारंटाईन करण्यात आले. या कामगारांच्या मालकांनी त्यांची सर्व व्यवस्था करण्याची हमी दिल्याचे प्रशासनाकडून सांगण्यात आले.