महाराष्ट्रात उधळली "लाली' 

नगर : पुरुषोत्तम करंडकाच्या महाअंतिम फेरीतही नगरची "लाली' उधळली. 

न्यू आर्टस, कॉमर्स ऍण्ड सायन्स महाविद्यालयाच्या "लाली' एकांकिकेने हा इतिहास घडवला. प्रथम क्रमांकासह तीन वैयक्‍तिक पारितोषिकेही या एकांकिकेने पटकावली. यापूर्वी नगरच्याच "माईक'नेही हा बहुमान पटकावला होता. 

हेही वाचा - शिक्षकांच्या कष्टामुळे शाळांचा दर्जा टिकून 

महाविद्यालयीन विद्यार्थ्यांमध्ये महाराष्ट्रातील मानाच्या समजल्या जाणाऱ्या पुरुषोत्तम करंडक एकांकिका स्पर्धेची महाअंतिम फेरी 27 ते 29 डिसेंबर या कालावधीत पुण्यातील भरत नाट्य मंदिरात झाली. या स्पर्धेत पुणे विभागातून नगरची "लाली' सहभागी झाली होती. पुरुषोत्तमच्या अंतिम फेरीतही या एकांकिकेने प्रथम पारितोषिक मिळविले होते. या एकांकिकेचे लेखन व दिग्दर्शन कृष्णा वाळके याने केले आहे. महाअंतिम फेरीत सर्वोत्कृष्ट एकांकिकेचे प्रथम पारितोषिक "लाली'ला, सर्वोत्कृष्ट दिग्दर्शकाचे प्रथम पारितोषिक कृष्णा वाळकेला, सर्वोत्कृष्ट पुरुष अभिनयाचे प्रथम पारितोषिक संकेत जगदाळेला, तर सर्वोत्कृष्ट स्त्री वाचिक अभिनयाचे पारितोषिक रेणुका ठोकळेला मिळाले. 

अवश्‍य वाचा - जिल्हाधिकाऱ्यांकडून अण्णांच्या तब्येतीची विचारपूस

"माईक' व "लाली'ने यश मिळविल्यामुळे महाराष्ट्रात नगरच्या नाट्य कलाकारांना नवीन संधी उपलब्ध होणार आहे. महाअंतिम फेरीचा पारितोषिक वितरण समारंभ रविवारी (ता. 29) उशिरा ज्येष्ठ रंगकर्मी चं. प्र. देशपांडे यांच्या हस्ते प्रदान करण्यात आला. या वेळी महाराष्ट्रीय कलोपासकचे अध्यक्ष अनंत निघोजकर, परीक्षक श्‍याम जोशी, शुभांगी दामले, प्रा. प्रवीण भोळे यांच्यासह महाराष्ट्रीय कला उपासक संस्थेचे पदाधिकारी उपस्थित होते. 

वाचा - आरोपांच्या फैरी, तरी बैसले शेजारी

 
"लाली'चा प्रवास 
"लाली'च्या जन्मापासूनचा आत्तापर्यंतचा प्रवास अवघा 30 प्रयोगांचा आहे. मात्र, या एकांकिकेने 10 सांघिक करंडक व 45 वैयक्‍तिक करंडक असा बक्षिसांचा खजिनाच लुटला आहे. पुरुषोत्तम गाजविणाऱ्या "माईक'मध्येही कृष्णाचा सहभाग होता. 

 
"माईक'नंतर "लाली'ने पुरुषोत्तमच्या महाअंतिम फेरीचा करंडक मिळविल्यामुळे नगरच्या तरुण नाट्य कलावंतांत उत्साह व आशेचे वातावरण आहे. या दोन्ही एकांकिकांनी नगरच्या नाट्य कलावंतांना एक नवा ऊर्जेचा स्रोत दिला आहे. 
- कृष्णा वाळके, "लाली'चे दिग्दर्शक व लेखक